هنا

[فقار الكرخي]

يا مطر زخهه بحلاتك
وأترس إشليلي مطر
حالوب ،
يا هو الچان يمعود دخيلك
ارد اطير وياك
وأتنفس گذايل

وتدري خالي ،
الگذله ورده
الگذله هلهوله
ضوه إبراس الجدايل

يامطر طگني إبسبحتك ،
خرزة
خرزة
وخلي شاهودك بأيدي
وآنه أبيت ،
ومن اصيحن بات
انزل يا فحلنه
واگعد
اگعد
وافتح اليمنه دخيلك ،
بقن هالنهدين
ولفني الدنيه گمره
وارد أذبن ليل حزني
وأسكر إبميتك أغني

يا ديچ يابو عرف
گعّد حبيبي الترف
گله المطر تلني
يخدرني چني إبحلم
خل يجي إيلعبني
إينزعني ثوب المطر
وبميته إيضمني ..

يا مطر طگني دخيلك ،
كلشي عدنه
وارگصلك گمر بالروح ،
يتماوج محنه
ولمني طينه ،
ودوفني إبمي الورد
دوف غطيني إبحنينك
ارد اطگ شجرة محبه

إتضوي من طاريك
وتخضر فخاتي
ومن تهزها الريح
والله تصيح باسم الله بناتي

ونام حدري
وهزني امطرلك
عسل ، بوسات
ترچيات ،
عيديات
وشتأمر أغاتي

وطير تلگه ابصدري عشّك
وغني وآنه أسبح إبحسك

ويا ديچ يابو زلف
عوعي اعله راس الولف
گله المطر هزني
ولفني ابگلايد شذر
خل يجي اينزعني
ويعلگلي شمعة عرس
وبميته ايزفني ..







موفق محمد

[↫روشة.•]

تسلم فقار...

[آمــالــ]

احسنت الاختيار فقار ❤️

[فقار الكرخي]

نورتو الكون بالعباس