دلّيني العراق منين ..؟
لا تبچين
غيمة انتِ توجّين
و على آخر جرح بالروح بچفوفچ تحنين
تجيبين الليالي الـ ما تجي و گمره تجين
نهر يشبگ نهر .. للموت
ونهودچ عطشها سنين
يلين الحزن .. بچفوفي .. وخصرها يلين
النهر دافي و حزين
الضحك گمره و بساتين
صدرچ مهره .. مذعورة
توّج الروح بالچفين
تصهل بليل
و ترد
هالة خضرة من الحنين
صحراوي هذا العطش يحلم بالنهر چفّين
يرف لون الخصر گبل اللمس : جنحين
خَطف .. ياخذ حنين الروح
عليچ من العطش نهرين
اصابيعچ أغاني الماي
تتلون غنج وأسرار
گميره من الفرح وأسرار
اصابيعچ ورد من نار
تجيب الگمره للظلمة .. و تفل أسرار بأسرار
اصابيعچ برد من نار
اصابيعچ ليالي طوال
اصابيعچ توج گبل اللمس ذكرى و جمر تذكار
أحلم بطولچ نهر .. توج خضرة البساتين
مهر ياخذ اصابيعي بصهيل و يشعل الصوبين
علميني المشي عَ الماي
علميني الرگص بالنار
أسهر الـ أبعد صبح .. هيبة و گمر وأسرار
ويهيم الحنين عليك هالة من الحزن وأسرار
علميني أجيس الحجر ينطوي بچفي و يلين
علميني ..
علميني ..
آخ
أدوسن عَ الجرح صوبين
درويش الأغاني ما فرح طوله الحزين
يتلگّى النهر جرفين
و يفيض من العطش لو رفت العين
و ماتدرين
عزيز يعاند الغربة و يرد من الفرح كلّش حزين
يهيم خيول مذعورة ما تعرف تريد الـ وين .. ؟
نزيف عيوني ياخذني .. العراق منين .. ؟
يجي منك جرح .. أفرح .. يجن جرحين
صحراوي هذا الحلم يمتد للأبد ماشين
ما أدري إنتِ من يا صبح مهرة تجين
النفس ورد البساتين
اخذيني . .
اخذيني . .
أصد الخوف من يعرض تجين و ما تجين
الجمر يخضر من تجين
الگمر يكبر من تجين
يا لون البرد بچفوچ الحلوين
تزيد من الحزن كلما فرحها يزيد
يا خفگ الحمام ..
و لهفة التنهيد
مذعور الصدر
دوّخ اصابيعي ..
و حيّر النهدين ..
سرب من الحمام يطير .. مدري الـ وين .. ؟
كل عمري يمتد نهر .. يفيض يضيّع الجرفين
أموت من العطش
لمن تجين .. و ما تجين
أمر برد الصبح بچفوفچ .. تحلمين :
شمس تاخذ اصابيعي نهار الغبشة الماشين
انتَ منين ..
وآنا منين .. ؟
جرح يجمع عذابين
تحزن .. أشوفك
گمر
يغرگ
بالنزف
ليوين .. ؟
حزين الگمر .. بچفوفي .. ليالي ينوح
يا صوت الـ يهيم .. شراع .. للروح
يا .. سر . . الـ يجيب .. الروح .. للروح
يا گلبي .. الـ عليك .. بذلة مذبوح
إشعلي الماضي كلّه بليل
و حيل إبچي عليَّ شما بالنفس من حيل
اخذيني ظلام و خوف
لمّيني نزف ما شوف
داويني گمره الوطن
يهيم عيون للشوف
اخذيني نهر أزرگ يفيض من الفرح ويشوف
يلمض الليل و يفز : خيل وشمس وسيوف
حزين النهر يتلمس بيديچ طيوف
يوج برد الأصابع من حنين الخوف
ويهيم غبشة الصدر .. لچفوفي كلي .. نشوف
مذعور الشَعر بالريح .. مهرة بلا رسن وطيوف
اخذيني خذاني الخوف
اخذيني نزف شاعر يطيح إعله الورق ملهوف
اخذيني قصيدة هور تدوي بكل حرف مشحوف
اخذيني ..
اخذيني ..
گمره وحصن وسيوف
أريد الـ ما تريده
الناس
وأحلم بالظلام يشوف
أهيم من الحزن وأوگف بطولي شراع
ولك ماي النهر كل عمره بس .. وداع
الوطن بين الأصابع ما يمس الگاع
أفرح يموت الفرح
أحزن
توج أسرار
أسافر بالدمع مرتين
• مرّة حنين الصدر ياخذني مدري الـ وين ..؟
• ومرّة الأصابع توج روحي أغنية بچفّين
وين ..
وين تغنّي بچفوفك تريد الـ وين ..؟
يهيم الصوت بالگمره عَلَيْ : مهرين
ياخذني الصهيل و يرد خوف يفزز النهدين
أغانيّك حنين چفوف بالنهدين
حمام يطير .. بالگمره .. لوين ..؟
أطير بلا جنح جنحين .. !
أغانيّك نهر تاخذ حنيني أنهار
أغانيّك سفن من نار
فرح ورد القميص بجية الخطّار
أغانيّك .. جمر بيت الفقير و عزّة الأفكار
أغانيّك .. تهز ليل المدينة بگمرة الاسرار
أغانيّك فرح درويش .. يلعب بالجمر والنار
أغانيّك .. تمس جرح الشهيد بدمعة الثوار
وين
وين تغنّي بچفوفك تريد .. الـ وين ..؟
يهيم الصوت بالگمرة عَلَيْ : مهرين
أغانيّك نزيف عيون تجيب لكل صبح شمسين
دلّيني العراق منين ..؟
الشاعر عزيز السماوي
رد مع اقتباس
