سالفة ورباط
ابو جاسم رجال چبير توفي بداية الثمانينات مرة سولف سالفة يگول چنا بالعماره وچنت حرامي وگبل الحرامي مايبوگ من ديرته لان عيب ..يگول مره نعتولي (وصفولي) تفگة بديرة بعيدة واحنا اثنين رحنه عليه انبوگها صعدت فرسي وصاحبي وراي وصلنا العرب ووچدنا المچان ( أكدنا مكان البيت) ورحنا بالليل وره مانامت الناس اجينه خليت صاحبي لازم الفرس مسافة وانا وصلت للبيت طبعا هو بيت شعر... لگيت مره تطحن برحا يگول شاعلة بطل وتطحن اجيت من وره البيت وطبيت دورت التفگة لگيتها ردت آخذها واطلع ..والمرة التطحن گامت يگول انا شفت مرة ثانية بالبيت نايمة اتمددت بصفها منا لمن رجعت المرة للرحا انا گمت ويه گومتي المره التطحن التفتت شافتني وصرخت والمره البصفي گعدت انا اخذت التفگة وشردت وصلت الصاحبي صعدنا على الفرس وشردنا وصلنا مسافة بعيدة گلت الصاحبي احنا مانروح لأهلنا گال ليش گتله يمكن راح تصير مشكلة من وراي لان المره التطحن شافتني نايم بصف المره وعبالها غير شغلة گال وهسه شنسوي گتله نضل بمچانه للصبح وانا اروح للعرب وانت تضل هناإذا ماكو شي اجيك ونروح وإذا اكو شي نشوف شلون تصير يگول رجعت للعرب ووصلت يم بيت شيخهم سلمت وگعدت على أساس خطار لگيت العرب تريد تتعارك أهل المرة وأهل الزلمة والسالفة مثل ماتوقعت عرفت الشيخ مالهم گتله محفوظ تطيني البخت (تعطيني الامان)واحل الشغلة گالي الك البخت والديوان كله سكت گتله محفوظ اكو واحد بالديوان يعرفني باوعو عليه كلهم گالو لا ..گلت علمود مو يگولون هذا عاشگها وشايفينه.. گتلهم عمي انا حرامي وسالفتي كيت وكيت وسولفتلهم السالفة كلها..گتلهم انا تسترت بالمره النايمة حتى لاتشوفني المره التطحن .. يگول العرب كلها حمدت رب العالمين ماصارت بيناتهم طلايب والشيخ گال لاهل المره عليكم خمس دنانير ورجل المره عليك خمس دنانير والشيخ گال انا عليه خمس دنانير وقاط الك وقاط الصاحبك والتفگة الك طبعا سعر التفگة بوكتها خمس دنانير گتله هديتكم مقبولة بس التفگة ترجع الراعيها ..مشينا انا وچم واحد من العرب وصلنا الصاحبي رجعنا التفگة وأخذنا هديتنا ورجعنا ومن هاي السالفة بطلت من الحرام وتبت وأسأل الله يغفرلي ......
شاهد سالفتنه هسه اكو واحد من حراميتنا عده غيره مثل ابو جاسم ويستر هذا الشعب المظلوم هم بيهم واحد يگول كافي بعد تبت وينصف هذا الشعب هم هم هم .
رد مع اقتباس
