اريدن مثلي کون تصادفك بلوه
تتمرجح تريد اتطيح من اسنين
بس أنه المچلب بيك بالگوه
أريدك تثبت وعرجك يكض بالگاع
وأنته بلا عروگ وطينتك رخوه
مصوفر من زرعتك مو أكيد تعيش
بس ماگلت تعبي وياك مايسوه
وگفت وياك خشبه ومن تهب الريح
طول بطول اسندك صرت الك تچوه
وطولت الخلگ كل يوم ارد اسگيك
بلچن بيك ضنه وبالصبر تروه
وثاري الماي ضرك مانفع وياك
والتعب التعبته زين ماسوه
گاعك مولحت والصبخ خضر بيك
ماخضرت بيك اميتي الحلوه
وكل هذا وحملتك ماگلت مذموم
ياچوله وحماده وكلشي ماتسوه
من يگدر يعاشر وحشتك باليل
غير عيون ذيبي وطيري الشلوه
من يگدر يجرعك كاس تلوه الكاس
وانت المر مزاجك والصبر سلوه
وينشدوني عليك بشك جثير اصحاب
وگلهم اريحي وماينكر الخوه
واگلهم مستحب بالعشره مامكره
اغالط روحي بيك واحرف الفتوى
ابتليت بعشرتك يلماعدلت وياي
اريدن مثلي کون تصادفك بلوه .
للشاعر الكبير طالب الدراجي
رد مع اقتباس
