المشاركة الأصلية كتبت بواسطة ا لـٰٚـِْاء سـۛـۛـلـام
يعني قانويا اندبندت صرت بس يبقى سترونك بعد كم يوم بعون الله .
كل عام وانا سعادة لنفسي وللاشخاص الي حولي .
اليوم امي وين ما تروح اروح وراها واسالها الف سؤال .
صراحة جان اكثر شي مفرح وهيه تحجي هالذكريات .
هذا الحوار حتى يبقى موجود ، واكدر اقراه كلما ردت ، وتبقى مشاعر لطيفة اشاركها وياكم بهل يوم المميز .
امي يمه يوم ، شنو احساسج من اجيت للدنيا ؟
_كظيت يومها اصعد وانزل الدرج وافتر بيج بكل اركان البيت .
ما تعشيت شي ،بس بيضة سلكوها واكلتها كوه ، رحت يم ام ايمن القابلة ، والدنيا ظلمة ماكو كهرباء ، وبالصالة ببيتها ، وبس ضوه اللاله ، واجت الاء للدنيا .
جنت مختاره اسمج حتى قبل لا اتزوج .
وظلت خالتج تصلي صلاة الليل وتقرا قران لحد ما وصلت للبيت ، جانت فرحانة بيج ، وخايفه عليه .
" اجيتي طفلة دبدوبه وزنج 4 كيلوات .
وكلش بيضة وحلوة ، وانت تبجين واني اسمع صوتج اول مرة ، ماعرف بذيج اللحظة ابجي من شنو .
الصبح بشروق الشمس يلا شلتج اول مرة ودموعي تنزل على خدوج من الفرحة واني اشوفج بيدي بعد ما جنت تتحركين ببطني ، هسه بيدي واني المس وجهج واحس شكد ترفه ورقيقة .
واحساس صرت ام لأول مرة .
وصارت عدي طفلة .
ابوج جان فرحان بسلامتي ، وفرحان بيج ، بس كلش جان يخاف يشيلج ، بس ماكدر اوصفلج سعادته وهو يباوع الج .
بيبتج الله يرحمها ، كالت ، الطفلة وجهه يلالي حمرة بيضة . وجانت تصلي على محمد كلما واحد اجه ، وره ما يرحون تكول سولها حرمل ، اخاف من عين الناس عليها .
وجدج الله يرحمه فرحان بيج هوايه ، من كبرتي شويه ، مجان يقبل تبقين بالكماط ، يحب يلعب وياج وتضحكين اله ، وتفرفرين بيدج .
جان جدج يغنيلج "ياقادير وياقادير آلاء لبست مناظر ، والاء طبت كلية ولمت الوادم عليه "
وعمامج همينه يتعاركون حتى يشيلوج ، بس جانوا اجداج ما يقبلون ويصيحون عليهم .
"جانوا صغار يعني اعمارهم تقريبا 13 او 14 سنة ."
بمرور الوقت جدج الله يرحمه جان من تبجين بليل ، واريد ارضعج ، (يكول كعدي كعود واخذيها بحضنج ديربالج على لاله ) .
جنت من اشتغل اعوفج يم اجداج ، جانوا ياخذوج للحديقة ويغنولج ويصفكون الج ، ومن تطفى الكهرباء يهفون الج .
تكول امي ، جنتي من تبجين بالبيت بليل وماكو صوت غير صوتج ، جان جدج الحجي يكول " راية الله بيضة وصار عدنا جاهل "
سعادة البيت الاولى لاجداج وعمامج وعماتج وفرحة ابوج الأولى ، وطمأنيتي الاولى .
إحساس السعادة الحقيقة والفرحة من كل قلبي واني اسمعها دتحجي وشلون عيونها تلمع ، وكل يوم محبتهم تزيد ، ورغبتهم وهمه يشوفك باعلى مرتبة .
بعامي هذا وبكل سنة من عمري ، امنيتي يبقون سند اليه ، وفرحه واكدر اسعدهم ولو بشي قليل .
هيه اسطر قليله ، بس ذكريات ما تنشرى بالدنيا كلها .
.....
كل الحب لكل الاصدقاء الي عرفتهم ، اتمنى تدعولي تخلص بخير وسلامة هاي السنة ، والسنة الجايه احتفل بكلية بدل مدااحتفل ويه السادس السنة .
كل الحب لكل الأشخاص الي اثروا بحياتي سواء جانوا يدرون او لا .
كل السعادة الكم بحياتكم اليوم وباجر وبكل لحظاتكم
رد مع اقتباس
؟
