هنا

[سلام الكريزي]

ويَّ الغباشي
التغسل عيون المدينة ...
ويَّ الزازير
التدبي شمس الله بجنحها ...
وتفتح لكل ضحكه باب
ويَّ السنابل
من يطوكَها الصفار
وتبدي تنزع لونها باخر برد ...
يبتدي رماد المواكَد
يحجي المتانات فوكَ رموشي سجه ...
وتبدي روحي ...
تلم حزنّها
ويَّ النواطير الترد بعيون حمره ...
وانته وينك ...
يارمل دليني جذرك ...
عايش انته براي صحره
ااااخ ...
ياماي النذر للريح عمره
وااااخ ...
ياجدحة كَلايد
نامت بعين الغريب بليله كَمره
انته وينك ... ؟
هايه روحي
المالكَت ريتك تبدي نداوة انفاسك دفو ...
الصنطه غربه
ولا جدم روحك سحكَ عود بكَفاي وكَلت انته ...
أبدي وي عيوني
هلبت هاااا أجيت ...
ومدري شنهي بصدري فز
وناشغت بس ما بجيت
وما حجيت ....
وغير بس لروحي وانته.....
بطيف عابر جلبيت
ومدري ياجف الخذاك وما صحتني ...
يا ولك ...
يا طيف عيني التيهتني ...
مدري يافَيّ ...
الأخذ مونة سمارك من عفتني ... !
ومدري يا زحمة أصابع
جاست حرورة إِدَيه الفوكَ اديك وماقرتني ... !
ومدري ياعين طولك شرباها وعَطَشِتني ... !
شَبَرتلك ...
بلكي ترجع .....
وحتى ملت وجهي عرافة سلفنه ...
وحَرزِتلك ...
حِنَّه وقرايات يم سيد سلفنه ...
وياااا حلفنه .......
تبعثر بجف المراويح الردتها
وسودنك كثرة حلفنه ...
ليش ... ؟
يالناوي اعله جفهم ما كَلتلي
جا عرفت مكَاودك لجفوفي نزوه
جا نكتت رماد موكدنا ...
اليتاني فوكَ رمشي كَبل جيتك
جااا لمت كل الروازين
الخذتني لديرة ظلمة وما نطرتك
ومااا عرفتك إلا تّالي ....
وكَاع روحك نزت بدم الضحايا
الكَبلي جانو من سحكَتك ....
راح اشيل عيوني مني ....
حتى من اسمع طواريك القديمة
ماتلوم عيوني روحي
.......................
سلام الكَريزي
العراق _ ميسان

[محمد صبيح]

قصيدة جميلة جداً ، دمت راقياً

[سلام الكريزي]

شكرا لك أيها الأستاذ الرائع