شنهي معناها تطوخ الكحل بس بعين وحدة
گلبي صفصافة وفة
يم الجرف ومتاني تذبل
وشتگله اليوگف على أطراف اصابيعه
على شفة بلم يسأل
ليش چف يعاتب خياله
ويشيل بنصه مشعل
وانت تگدر
تلگه عيني الضاعت بفي خصرك وبحزامه تفتر
وانت تگدر
تجر خدي لچرچفك وتنگضه بوس وهو ينجر
ياللي طولك من يضك الثوب
متفصل مثل نرگيله تگلب
شنهي معناها تطوخ الكحل بس بعين وحدة
عين تلزم ،، عين تغلب
اجدام ما أخسر لون خلصت عمري اتنوع الهن
أتمدد الهن
أتحسس احرورتهن بشفتي ولك
واوگع مطر يغسل بسيفك
بهيدة عديني مثل مشي الحواصيد اعله كيفك
يالتدوس ، الروح داية
وتشلع من العرگ بعد الدوس
هذا الشوگ يمعود خطاية
تسيل فضة عيني من تضحك
وتتلملم على چفوفك مراية
انت مو أول مزكرش
يسحگ على الروح رايه
ياللي شوگك هدني من فرع الزريجية حمامة
ولمني يم الجرف وي الروج بردية و ابلامة
وشيركده اليوگف وماهن اعظامه
زين كاظم
رد مع اقتباس
