فدوه حاجي السندباد البيك خلي يشك جوازه
خضر بروحي صليب
واذنت بيه مناره وماكو رب
طيح بس اندل اسلالك يالرطب
والحياطين الها اذان
وجان بس حايطهم اطرش
واخرس وضايع دواه
مايوصل صوتي للواكف وراه
لاتسافر
فدوه حاجي السندباد البيك خلي يشك جوازه
شوفتك عازتها عازه
وكلش اكرها القرائه وحيل اكرها الدرس الاول
واكره اقلامي ورحلتي التبچي سكته
شكد تمنيت اليدگ الباب مو قدوري انته
انه من يمي نسيتك بس شاسوي
لهذا البصدري الحنين الماله چاره
ارجع وكض كلبي بيدك
ماتكض كلبي الجكاره
كلبي غار وماكو بالدنيا حمامه تلوگله وبي تبني عشها
روحي فراشه بحديقتكم اجت تشتم عطركم لاتنشها
ياعيونك جروة ايمام وعلگ حظره
ومناراتك ركبتك
استلذ بشارتك واكرط تربتك
يابعد هاي الولاترضاش تغمض
جنت انامن وكفه خاف يمرني طيفك
اااخ كون الطيف ينكض
بيست بيه السيوف وفرهد الصفصاف لوني
والجرح لمن يجي من اعزاز هذا اعتبره دين
هواي كاتبلك رسايل بس ولا زاجل حنين
هاي النجوم بسماك دموع كمره
الكمر هم مشتاك مثلي
المطر..... مثلي الوادم يحبونه فتره
الطين ..... مثلي معزب يجلب باليسحگون صدره
الناي ..... مثلك يهوى اليكضون خصره
انه ذاك اليصفن اسبوع عله بابك زلمه ذابل
انه ذاك المن يجوع يروح ياكل بالرسايل
انه ذاك اليطلگ من يريد يكتبلك قصيده طلوگ حامل
انت وينك
طلع دموعك واطلع دموعي ياهو الباچي اكثر
طلع زلوفك واطلع زلوفي ياهو مشيب اكثر
شكو مرايه ببيتك مشتهيه وجهك
جنت اكلك حبني
وتكلي ضروف
ياسلام الله عله ضرفك
وهيه هيج
تكبر بعينك الديره البيها ولفك
حبني حبني
حبني مو شيبي نهبني
وبابكم من كثر مادگيته بغيابك كرهني
ياقطار يكودني لديرة غرب مابيها ذكرك
كلي يابير اليعطشني واشربك
تيبس جفوفي وترد خضره عله خصرك
ياحمد بطل نحيبك
العاهداك يشيل حملك ....ياحمد ماشال حملك
خاف مو مالح حلبيك
دني راسك مشتهي ينام عله ايدي
دني اذانك مشتهي اقرالك جديدي
احنه احنه
الوادم الماصخ خبزنه ....المايغزر
احنه احنه
الننسحگ سحگة التربه .....ومانشور
احنه
النشگن رسايلنه بوجهنا وكلنه فدوه اليحب يعذر
حمزة الجابري
رد مع اقتباس