لا تتزوجيه على أمل ان يتغير..
عن تجربة اتحدث
سلام عليكم بنات كل عام وانتم بالف خير منشوري هذا رسالة مني اليكم..
حبيت اشاركم تجربتي الشخصية بزواجي من شخص يكبرني ب3 سنوات
اجالي من طرف واحد بدائرتنة.. بالبداية رفضته كونه ميناسبني لان سايق
وشهادته بسيطة واني مخلصة دبلوم عالي ومديرة شعبة..
بس من مدحلي بيه وبرجولته وكيف كان معروف بشجاعته وهو يقاتل بالحشد الشعبي.. وافقت اقابله ومن اول ماشفته عجبني المواصفات الي ردته بيه.. شاب وسيم طول ابضخامة ماكو وحدة متشوفه اذا متنعجب بيه
صارت المشية وعقدنة.. واقترح اناجر بيت اني رفضت كتله ما اگعد بايجار عندي شقة مركونة صارله سنين خل نگعد بيه بالگوة يلة قبل
اثناء فترة الخطوبة -واهنا مربط الفرس- شفت بيه طبع ابد معجبني عصبي جدا ويتزعل على اتفه الاسباب وخلگه ضيق جدا
يعني بين قوسين معشت وياه ايام حلوة 24 ساعة لو زعلان لو متعارك وياي على شغلات متسوة
وحاولت اكثر من مرة الغي الخطوبة حتى قبل ما اعقد عقد محكمة بس جان يوگعلي تواسيل وميفك ياخة عني
عجبني تمسكه بيه .. واتحملت گلت يلة ( يتغير) لا والله مثل ما گالوا (ابو طبع ميبدل طبعه)
صارت القسمة.. شگللكم بنات متهنيت بزواجي 24 ساعة مشاكل وماكو حاجة بالبيت مكسرلي ياها .. ماعدا قلة الاحترام والاهاين الي يهينلي ياها گدام اهله وبالشارع اتحملت گلت يمكن بداية كل زواج اتصير هذه المشاكل..
حاولت بكل الطرق اصلح الوضع بيني وبينه.. حتى دخلت اهلي واهله والناس الي اجو بالمشية جبناهم واخذنة عليه تعهد بان يبطل مشاكل حتى اتسير القافلة بيني وبينه بسلام ..
بس شگللكم يرجع اسوأ من قبل.. وهاي ماعداها كل مرة اروح لاهلي زعلانه ساعة اكوللهم زعلانة وساعة لا حتى ما اشوه صورته گدامهم لان حبيته فترته
مرت الايام والمشاكل بيني وبينه اتزيد متنقص جزعني ومللني .. حملت وصار عندي طفلة منه .. اتأملت الوضع يتحسن
بس صار اقبح من قبل على اتفه شغلة يگوم يصيح ويعيط ويهددني بالطفلة ياخذه وينهزم واكثر من مرة سواها ياخذه يريد يطلع بيه حتى مرة بعده الاربعين ماله مطالع اخذه يريد ينهزم خلاني اعيط واصيح.
وهم صبرت گلت اصبر الطلاق مو هين اني موظفة وما اريد الهب والدب يشمت بيه.
كبرت بنوتي صار عمره 8 اشهر وكبرت مشاكله وياه .. جانت حبيبتي من اتشوفه يصير عصبي اتگوم اتعيط وتبجي لو مرات تضحك عباله ديتشاقه وياية
اهنا ابهذه اللحظة وكفت استوب .. گلت مستحيل بنتي اعيشه ابهيجي اجواء مشحونة واب ميحترم زوجته ابهذه الطريقة.. هي راح تتاذه واني هم
فطلبت الطلاق منه رفض كعادته ويتوسل ويوعودني راح يتغير.. وكله كذب بكذب وصلت دنائته يفشر عليه گدام صاحبه ومن اتصير مشكلة گام يفتح باب الشقة يغلط ويسب والعمارة كله درت ابمشاكلنه حتى بدة يضربني
وبدون علمه حاولت اوكل محامي اطلگ منه من دون تدخل اهلي حتى متصير مشاكل بس هو مديعوفني بحالي..
الى ان طفح الكيل عندي باخر مشكلة
صارت بيناتنة اتصلت على اهلي بدون علمه لان هو كل مشكلة ياخذ مني الايباد والتلفون خاف اخابرهم..
ابهذا اليوم الايباد ضميته من عنده على الرغم حاول يدور عليه بس كتله ما اعرف وين
المهم اول ما طلع من الشقة خابرتهم گتلهم تعالوا اخذوني اريد اتطلگ منه هذا مينعاش وياه..
اتفاجئ الصبح بدخلة اخوتي وزوجة اخوية جانت وياهم اتلاغوه بالكلام وگلوله انت واختنة وصلتوا لطريق مسدود والطلاق هو الحل
حجاية منا وحجاية مناك هددهم لاهلي ايسويه دم بلغوا الشرطة عليه وسوينه بلاغ وذكرت للقاضي بانه هددني بالقتل واخذ كل مسمتمسكاتي وفعلا هذا الشي صار وصدر امر القاء القبض بحقه وحاليا جوة ايدي
وطبعا هذا الموضوع صار اكثر من اربع اشهر اني گاعدة ابيت اهلي دامشي بموضوع الطلاق ولحد هذه اللحظة ديحاول يرجع مخله واحد مدزه.. بس اني قافلة لاخر نفس لان على يقين هذا الشخص ماممكن يتغير ابد..
حتى مشاعر الحب الي كنت احسه تجاهه اتحولت الى كراهية ونفور بسبب كثرة المشاكل وقلة احترامه وحاليا اني مرتاحة جدا لقرار الانفصال احس هسة يلة اتنفست وراح اعيش حياتي بشكل طبيعي وية بنوتي الغالية لان صدگوني مرات الطلاق ايكون رحمة على الرغم هو ابغض الحلال
فبنات نصيحة مني الكم فترة الخطوبة مهمة جدا اذا شفتوا بخطيبكم شي متحبوا او طبع محلو لاتوافقون على امل انو يتغير لا والله ميتغير..
وديربالج تاخذين واحد عصبي جدا لان مينعاش وياه والحياة وياهم عبارة عن جحيم.. واكثر الطلاقات الي دتصير من اسبابه انو الزوج عصبي
هاي اولا وثانيا حاولي تاخذين واحد من نفس مستواج الثقافي واذا مكان من نفس المستوى خل يكون عنده مصدر رزق ثابت وظيفة او مشروع معين جوة ايده.
لان زوجي بآخر فترة گام ميشتغل اعتمد على راتبي يعني بغض النظر عن سوء طبعه واخلاقه رجولته فقده امامي من گام ميشتغل..
ولاتتوقعون ابد كنت محسسته بان اني احسن منه بشي معين لا والله جنت دائما اگوله انت زوجي وحبيبي وابو بيتي.. بس الاعوج اعوج
وثالثا نصيحتي للي محظوا بزواج ناجح مثلي.. ديربالكم اتخلون احد يوگف امام راحتكم وراحة اولادكم اذا اتشوفين زوجج ممريحج ومحول حياتج لجحيم ضرب واهاين وغلط لا اتقبلين على نفسج اتعيشين ابهذا المستوى... صحيح يگولون الزواج قسمة ونصيب بس الطلاق قرار..
فري بنفسج وباولادج وعيشي حياتج وطز بالشماته الهم الله اهم شي انتي ولاتگولين ما الج احد.. ترة الله موجود وهو خير وكيل
اعرف طولت عليكم.. بس حبيت افضفضلكم واحجيلكم مايدور بداخلي تحياتي الخالصة لكم
رد مع اقتباس
المشاركة الأصلية كتبت بواسطة (حُر)
