رديت اعلى واهس شوكنه الخلصان
وكل طيف الرحل لعيوني رديته
ونفخت بجمر حبنه ولبس ثوب النار
وجمر الهجر بالدمعات طفيته
حضنت اشجم نهر جي صورتك بالماي
وبجيت اعلى الجرف والماي رويته
انا احساسي نبي وبشرني راح اتعود
كف الحزن كلي الحزن مليته
ابمكان انيابي خضر فرح فوك اشفاي
وطولي المنحني رجعتله عافيته
وكبل لاتعتذر كلت الولف معذور
وخاف اتشوف جرحي بضحكي غطيته
اشكبر خلكه الكلب بالبعد شوكه ايزيد
وايام البعد كثرن حنيته
العلم يبقه علم عالنعش فوك الكاع
وين ايصير يبقه بنفس قدسيته
اطش ادموعي الك طشت نجم بالليل
ويمر وجهك علم واعيوني ساريته
امنهد لحضة وداعك جفي ضل مطروح
ماطخه الهوى الملكاك ضميته
امن اشوفك كون تتلكاني ملكه اشيوخ
ومثل ملكه الغريب الهله امتانيته
البعد خلاني اموت بغير كطع انفاس
وحيلي الجان ماضل منه بس صيته
ماسئلوني بس جاوبت راح ايعود
حسبت جم جرح ويعاود البيته
احجيهه بفرح يغتاض منه الناي
ابخبر رجعتك جم حزنان غثيته
الخشب يرجف اذا بسمار مر عالبال
وبسمارك حرز بضلوعي دكيته
راس اشراعي دنك ودلي هيبه ريح
رايد بيك اكلهم راسي عليته
شد طولي اعلى سجه وخلي جيتك ريل
وشضيني المهم لتطول ماجيته
انا وكاعي غطانه الملح والشيب
وبقيت انطر خضارك عمر تانيته
مادام انته جاي الراح خله ايروح
طايح كل عذاب البيه سويته
...........................................
رد مع اقتباس
