غاد على بيوت الطين جف من المزن يرسم
وغيض من الشمس يمسح
علل يابس والمبلل يضل نيشان للحنه
اومن تزمخ الشاره
اعلى اللوان الدم يصير اوضح
وجان الفي يگرب الماي
يرگض والسواجي من التعب تنضح
او چنت سباحنه وفينه
چنت في للشمس تعرض
او بوكت المطر نمشيك
نسحگ هدوة اجدامك وكل طين الدروب ايفض
گبل.. گبل
وكت الگحط يمطر يوهس مزنته بكده
يأخر وشلت السباح وياك المطر عده
يالعگبك يسبگنه الحصد فزعه
ونضل اتراب ما يكبر عگب عينك
العوده اصفر الما ينشتل من عنده
وانت اجفوف تنگلنه رسايل ناس لليدري
ومتت يابوي يامونت رسايلنه
متت وجدامي ماتحمل ثگل عذري
گبل نمشيك من ييبس زرع بينه
يحنينه الخضار الفايض بطينك
رفت عينه مرادف گبل لاتنغلگ عينك
چنت يصياغة الواهس تگود التايه بنيتك
وهذا الروج مايعذر الماتندل سفينتهم
افه يابوي يالتدري اليجي بمتن السفينه
اشراعهم باشط.... ولا تنثلم نومتهم
ونفحط والدرب يركض
العمر.. يسحگ الماله اجدام
اوصوت الضوه ويصرخ
او ماضل للمكاون عين صلفه اتنام
خفيفه اجنازتك تجزي
ونضل خفتت بواچي حذاك
يادخان يالرايح ولاچنك شلت ثگل الحطب وياك
يالمگوطر يالمعمرهن بچفك اگبالك عرضت الحيطان
اوحته الخفت ماينگض امن الجازي ضعن دخان
وگبل لاتنغلگ
من لصفت موادع حطب بعنه سفينته
ومغتاض انشرگ من الخشب حلمك
وچي حلمك حلم ماضن سعر يرضي
ويضل شابگ الجاري شذر يلصف
ولاچن ليط راح ويالنهر يمضي
وكل هذا الحطب يگضي
او نحَطب اجفوف يتبارگ بصابعهن شذر مرقد
ويگوم الضحك من رماد اسود
ولن حلمك بعيد وعلى الراگ يصيح
يولاد الجمر يگضي
يولاد الجحيل انياب
يوسمكم زراگه وخفگته اتشظي
بعد عدكم ولا يلهيكم الموگد
مهو الموگد متاع المايضل عنده
يولاد البرد شاخص
وماينصاب بزمور الدفو الرمده
يولاد العمر رگضه
واليفحط اهنانه يموت واليوصل لغاد يموت
كلمن فحطته وحده
رد مع اقتباس
