افرش اجروحي بشليلك
جيس. دمهن ياوجع بيهن قديم
من فگدتك
گمت اطش روحي اعلى كل شباج فصليه
بجي والله كريم
انت حلمي وشوفك بروحي شتريته
ليش نايم وانا ماكو
فز يحلمي اكدار حلمه اشاعر اتفز شاعريته
گود عيني
المايگود الطيف شوفه تكبر الضلمة بخياله
شضيع المكتوب يلدمعك هلا وصوتك دلاله
وليش كل ساعي دنت نفسه اعلى حزني
يموت لو فك الرساله
وموش وحدة بوحدة تحسب
جلد مكتوب الموادع مايمض بيه البجاله.
والدمع مرواح مثلوم اعلى بيدر
ينعرف جتاله كيفه
للموادع مامحسب وهمتني
الينام وشايل احموله اعلى متنه مايريد يوهمه طيفه
كسرت امرايه دمعتي ومالي جف يصير راگ
وحنه غشمة
انا وعيوني نفرزن لمعت الشذرة بهاگ
وهمتني
وانا شاعر كلبه جفه ، مفطره بيه القصايد
كل جرح يصغر اضماد يفيض زايد
او مو تعرفه
طمع گلبي وجرحه اكبر من شليله
لاتروح شلون بيه
شيلت التابوت سهله وفركت الميت ثكيلة
يخضر او مضمام عشگي من يصوفر
خاف لا يسمة حطبه.
و من فگدتك عاتبيته
ياگنز روحي ارخيص اضامينك بغله منك
جان مضمامك گلايد وانت جنت حزاز رگبه
وموش گبحي انا تعرفني
ودوم اگل للهور هاك اشفاي اخذهن وطني گصبه
يارفيجي
شكثر باجيك بسكتي ،
المامربي القفص جنحه
وراد يعله مايطلع جناحه صفگة
وين يامضمامي الاخضر
ربعك وعدلين كلهم ما الك بالموته رفكه
عاد اخذني انگاب افيدك
النگاب اعلى الغريب زواگ ينشد
بلضنون ايصير شوفك بلچي منهم غاد تنعد
ياغصن يالعشي فوگگ
العشوش تبان بالفي عل الغصن وزرة ومعاضد
لليل غاد وماكو في ينشاف عدهم
غاد وسفه تنقري ابشارت مواگد
وين رايح
وانت مو بدوي وتسافر
مهو البدوي امتاعه ناسه اليذبح الوحشة بغريتة
يالمتاعك عيبك انته
وانا عيبي عل البعيد امولفه روحي
ومن تمر حمرة غروب تگول
هذا اشداد محطوط اعلجرحه
ومن يدور الخوف بيها
تظل تاكل روحه ابلا لهو الرحه
مو الك ياصاحبي اتابوت اليه
هلي بجيوبي امن اسافر
يلن متعود عليهم هلي بس فوك الجناسي
او لو عزت ياخوي اگلك
انت عاشگ خاف حسباتك جبيره هاك راسي
رد مع اقتباس
