اليسافر ينسعد بالغربة كالولي
واليعيش بهل وطن يشبع مئاسي
وانا ضليت حاير بين الاثنين
اريح كلبي لو يرتاح راسي ؟
نولدت انة بوكت يحكمنة جلاد
صح جاهل جنت بس الوكت قاسي
ومشة بينة الوكت وتغير الحال
من ولد الزنة لـ ولد الكراسي
وصارت طائفية وباسمك تموت
وكمنة نخاف ضمينة الجناسي
صار الموت عادي ودمنة مهدور
واخذنة ابوكنة الرقم القياسي
وكلت خليني اجرب بلكت ارتاح
اسافرلي بوطن مابي سياسي
ومشة بية القطار وكلبي موجوع
وعقلي يصيح رجعوني إعلة ناسي
وخلصت الطريق بتعب وافكار
ياخذني الوكت ويجيبني احساسي
..
وباول يوم يخلص بالبلد ذاك
اول مرة احس بروحي انسان
من شفت النفس ينسحب مو بالخوف
ومن شفت الطيور تغازل الاغصان
من شفت البلد مابي ملامح موت
لا طلقات تسمع لا تشم دخان
متروسة الشوارع ورد واشجار
لا صورة شهيد ولا اسم دفان
شفت اللون الاخضر سيد الالوان
وماكو قطع سودة تترس الحيطان
ماكو احزاب عدهم لا عمايم غاد
ولا واحد يمد ايدة علة النسوان
من شفت العراقي يعيش حتة يموت
بالغربة شفت يتدلل الحيوان
اسف ياوطن واحجي بصراحة وياك
انة والشعب والخارطة بنسيان
واذا تسئلني ليش رجعت وشوازاك
ترة امي وصاحبي ينطروني كل اذان
رد مع اقتباس
المشاركة الأصلية كتبت بواسطة أم جود♔
