قصتي وية الليل كاتبهة بقصيدة - الشاعر علي حيدر
جنت كاعد وية ليلي وعندي ثار
وهذا ثار وصعبة ينحل بصلح
الليل شد وياي ميخليني انام
واني ما فد يوم كاتلي صبح
اني ماجنت بحرب ضد الحسين
ومن جنت جاهل وزاعلت الرمح
حتة من اتنفس انفاسي حلال
ومابكت نسماتي من ورد الفلح
ليش كل هذا لعد بية يصير
وليش يبقة الليل يلجم بالجرح
وليلي جاوبني بحقد وبكبرياء
كلي ماردت احجي بس انت تلح
ياغشيم ابنادم بزادك يخون
ولله حقك تبقة كاعد للصبح
ياغشيم الدنيا غابة وانت طير
بس تحط بكاع ينجر الجـنح
احنة لو كتل البشر عدنة حلال
وانت نايم من اخيك تـنـذبح
الناس مليانة حقد والدم مباح
ومن تموت بخبزة دمك ينمسح
وياكلون الخبزة هم مايستحون
وفوك كل هذا ويسمونك وقح
ياغشيم الطيبة متسويك زين
مـا يـغزر دمـك يـغـزر مـلـح ؟؟
رد مع اقتباس
المشاركة الأصلية كتبت بواسطة محمد صبيح
