(احب مرّك )
أحب مرك حلاة الگهوه مرها يصير
من بُعــدك عرفتك غـــالي يـ الغــــالي
ألمني بعد ، وٱتكرك بجسمي جروح
حتى اگــدر اگــــولن ذكره خــــلّالي
من گتلك : احبن كلشي بيك ، يجوز!
گلت : هذا مرُائي ..وبالحچي يغــالي
الهجر نـــوع بصفاتك ، آنه قـــابل بيّ
وحبيت الــــدمع لنّه الـــــدمع ..مــالي
بهجـــرك علّمتني ..الليــــل مو للنـــوم
ولا لحظـــة سكون ولا وكت خـــالي
تتجمّـــع مواقف سنــه ، بلحظة ليل
وارجع عالدمـــوع إلـ مــالهن تـــالي
تــوّك يلّه حسيت بمحبتي ! شبيك?
چان القلم بيدك والسطر خــــــالي !!
بعينك تلتقي الجنه وسواد الـنـــار
من تصدلي القيامه تخـــطر ابالي
گالــــو: موت تنسه ..كلت: ماانساه
وخلّيتك بـــ إول صفحه بأعمــــــالي
وعاتبت السمه چي انت راح تروح
واعرف باچر اتحاسب على افعالي
خاطر ..لونسيتك صدگ، انه هناااك،
اتحــاسب علـــيــك وتخطـــر ابــــالي
عِشّره انبنت بدموع وسهر وسنين
تروح لغيــري كل هذا التعب تالي!
يمكن ، جائز أتصوّر ، اشك ، احتار
لو ، اعتقد ، خايف ، اظن ، حسبالي
ماتسوه بعد ،، صار التريده الناس
ومثل هدمة ثمود انهدمت آمالي
رضا الكعبي
رد مع اقتباس