ياهلي يا صوت التسابيح
بعيني الدموع تكوم واطيح
مهزوز وبلايه مراجيح
هزني الجفه وشمرة ظنوني
انه ادري رحتو وما تجوني
جا ليش تنطركم عيوني
والدمعه ترسم درب عالخد
شكد انجرح واتمرعد شكد
و ما احب اخلي بخاطر احّد
اضحك صدك من كلبي للناس
مكتر احزاني وعيب تنجاس
الحسرات تطلع ويه الانفاس
طلعة سجين وصاحو افراج
شفت الوجوه، الدرن ، والعاج
شوفة احديثه بطرة السياج
ما كلت اريد ولا تشهيت
ولا يوم عالمقسوم منيت
عندي شحلاته مفطر البيت
ضميت بفطوره الرسايل
يقراهن وما يوم كايل
يخطر ابالي حزن نايل
شكد عندي غيرج جنت
بس انت لمن رحت ضريت يعكوبي
بوجه الفرح سديت بوبي
ولميت المتانه بدروبي
غسلت الالوان الفوك ثوبي
كون المغيسل يسكي ليموت
بخت الحسن ويخضر الصوت
جا خرخشن بيد امي البتوت
يوجعني لون المغربيه
شگد ابجي محد يدري بيه
خلّص عطركم ريه ريه
......................................
يمه ي وليدي من الضوه يخاف
شلون التراب يصيرله لحاف
جاهل وليدي يريد لو شاف
شاف التراب وحيل وراده
جي سمع بي نامو اجداده
الموت لبن ادم كلاده
يوجعني لون المغربيه
شگد ابجي محد يدري بيه
خلّص عطركم ريه ريه
رضا الكعبي
رد مع اقتباس