(حچي الفقره )
اشحلاتك من تمرني ابلهفة امسافر
ابحلاة النجم من ايصاحب الشاعر
ابحلاة الدرب من يشرب حچي العشّاگ وايطيح ابحضن باچر
ابحلاة اعيون باب البيت والماي او حچي الغرفة او حجابك و آخر احچاية گلتلي : العمر فدوه ايروح لجدامك
او گلتلك من يمرنا العوز روحي افرشها گدّامك
گلتلي الماي من ينسه شواطيّه يظل حاير
او گلتلي الراي من ايضيع يلگونه ابگلب شاعر
او گلتلك چم قصيدة ! او ماگلتلي الوحدك امسافر !
او گلتلك فاسة الحطاب من اتحز نحر شجرة
تسمع رغبة النيران ما تسمع حچي الذكرى
ولا ذكرى ...
ولا خليتلي ابروحي جرح يبره
مشيت او ما خذت وياك (عطر النوم) و (گلادة حچينا) او (حلم حافي) او لا ( حچي الفقره )
سولفلي خذت ويّاك چم اشراع ؟ ريح العشگ ما تهده
رفيجك عنده چف ملّاح ؟ من يبحر ابگلبك يعرف ايرده ؟
يندل وين باب الريح ؟ خاطر من يهزّك شوگ يگدر بالدفو ايسدّه ؟
مثلي ؟ او طبعك المجنون حافظ جزره من مدّه ؟
فارس ؟ لو خذاك ابليل ؟
يقرالك شعر ؟ وايفسّر القرآن وايغازل حچي التوراة بالإنجيل ؟
هم دافي مثل گلبك ؟
هم من تنچفي ايشربك ؟
وفيّت الوعود اوياي لو اطلبك ؟
عبد الوهاب الحمداني
رد مع اقتباس
