من تحتار وين تودي الجروح
وتكعد وحدك بجروحك اتعد
من تلكه الوجع يبدي من الاعزاز
وتعزل روحك او وياها تكعد
من اتضيع من اسنينك اسنين
وتبدي ايامك لوحدها تشرد
من تختنك روحك بالحياطين
او وجهك عن المرايات يلبد
من تجويك اول شيبه بالراس
وجفوفك عله الحيطان تنشد
من تشوف ضحكاتك غريبات
وميلادك يصير وماتعيد
من ينام دمعك بالتجاعيد
وتبدي تغمض وبعيونك تسد
من ينكسر ظهرك وانته خيال
وتنطك بالحجي وماتكدر اتهد
من تحترك وانته بصفك الماي
وتبدي النار بسنينك اتفرهد
من تشوف وجهك توه كبران
ويذبل كلشي كدامك امورد
من اتطيح بين الأخ والأخ
وبطرك الدمع لاحلامك اترد
من ترسم غربتك عالشبابيج
وعله المامش عيونك ظاله تصد
من تتمنى روحك بالمحطات
وتسافر جذب بمتاعك تشد
من تحتار بين الليل والليل
وهمومك نهر ماساعه يركد
من اتعيش غربه أبين الاحباب
وابيبان هجرك ترجع تسد
ساعتها تعرف بايامك اكصار
وتطي لروحك ويه الموت موعد
ذيج الساعه تمسح كلشي مر بيك
وتكعد وحدك بجروحك اتعد
السيد محمد الموسوي
رد مع اقتباس
المشاركة الأصلية كتبت بواسطة Nazkul
