يموسى ابن جعفر...زوارك إجينه
يموسى ابن جعفر...عالموعد لفينه

سيدي يبن الزچيه گصدتك أنصارك
تمشي لرض الكاظميه عالعهد زوارك
تقتبس نور المحبه من تشوف انوارك
ياكريم ومن عطائك ترتجي خطارك
ضريحك تعطر...من الله ونبينه
يموسى ابن جعفر...عالموعد لفينه

جايه من كل صوب ناسك وانت تدري احبابك
لو يصير الموت شمره الا توصل بابك
بالصحن هالليله صرخه والدمع بعتابك
كل محب ناده يمهدي عظم الله امصابك
يزهراء يحيدر...وياكم بچينه
يموسى ابن جعفر...عالموعد لفينه

أربع احماميل چانو نعشك ايحملونه
هسه كل الشيعه تحظر سيدي ايشيعونه
وحده ايشيل الجنازه المهدي ميخلونه
والله تتحول جروح وشيعته ايواسونه
گلبنه التوجر...نار اللوعه بينه
يموسى ابن جعفر...عالموعد لفينه

للمواكب والمآتم أمك اتنادينه
واحنه صحنه ابصوت جينه فاطمه اتلگينه
كلنه يالزهره ابخدمتچ أبد لتوصينه
والله ماننساچ وانتي حاشه ما تنسينه
عهد هذا نحظر...لو نمشي اعله ادينه
يموسى ابن جعفر...عالموعد لفينه

كل گلب عاشگ يموسى الليله صار اعراجه
شوگ عنده للمناره وگبتك الوهاجه
يالوصفونك سند للوادم المحتاجه
سيدي عدنه حوائج وانت باب الحاجه
نريد النه تحظر...ياعزنه او ولينه
يموسى ابن جعفر....عالموعد لفينه

سيد علي الموسوي