عالمعتقد...يالرافضيه
حان الوعد...بالكاظميه
ياهله ابزوار موسى ياهله

هله بصحاب العزم واهل الثبات
كل مواقفكم يخوتي امجربات
صيحو يابن جعفر وسبع الفرات
إلا نگصدلك مشي امن اربع جهات
ثورة ربح....ماكو خساره
اتطيب الجرح...هاي الزياره
خلفت أنصار ثورة كربله
ياهله ابزوار موسى ياهله

حظرة الكاظم مزار العالمين
(إدخلوها بسلام آمنين)
هاي خدمتكم فخر لم البنين
بيكم اتزامط يخدام الحسين
مايغله دم...لجل العقيده
واعله الخدم...لامو جديده
تنطي دمهه للذي يستاهله
ياهله ابزوار موسى ياهله

إي وحگ من هو أقرب للوريد
الفاطمه الخدام يوميه تزيد
خل يشوف ابعينه ذاك الا رشيد
هاي حوبة فاطمه وموسى الشهيد
حكم الضلام...راح ابزمانه
بس الامام...ضل عالي شانه
طاغي راح وباقي ابن عقد الوله
ياهله ابزوار موسى ياهله

بالشكر يهل الوفه اتدوم النعم
نشكر الله الموسى خلانه خدم
والله ممنونين ونأدي القسم
إحنه لوما فاطمه نصبح عدم
هذا المشي...أوضح علامه
مانسوه شي...لومه الخدامه
اشگد علينه فاطمه متفضله
ياهله ابزوار موسى ياهله

نخدم اهل البيت وانطينه عهود
والبقية فاطمه كلنه جنود
لبو صالح ندعي ياربنه يعود
كلهه للمهدي خدم هاي الحشود
يحيي السنن...مهدينه يضهر
لبن الحسن...جمهوره نفخر
للفرج ندعي الاله ايعجله
ياهله ابزوار موسى ياهله

سيد علي الموسوي