قصيدة مكتوبة (دخيل الضامن) ✏️حسين حمدان الدلفي
#شور ياعلي أبن موسى الرضا ع
دخيل الضامن
أتوسل مديت الچفوف
أل مولاي السلطان الرؤوف
للضامن دمعات العيون
خليت النقطة اعلة الحروف
گلبي أيحن لزيارة ضريحك
يالضامن أقبلني ذبيحك
ياجرحي ألما شفتة وعشگتة
بالخدمة أحسبني جريحك
عمري أنگضة،،وما أدري شراح يصير وياي
آه يالرضا،،، مشتاگ أتعنة الگبرك مشاي
أقضي قضا،،، عمري الراح بلا خدمة مولاي
أنا الراجي العطف منك على عبدك
يموت بلا وصالك گلب ال يودك
********
من تنزل دمعات الغرام
لعتابك تبعثلك سلام
ياسلطان الخدمة الغريب
يمهيج أحزان الخيام
ظليت أحلم يايوم أشوفك
يكتلني الهم لوما أطوفك
بوادي الحب دلالي خذاني
لا أگدر أوصل لا أعوفك
أبعيد الدرب،،،وباد الحيل وقل مني الشوف
لون الگلب،،، مو بس وجهي لونة المخطوف
بس مو صعب،،ترد حيلي والشوف المكفوف
العليل ويوصل البابك صدگ يصحة
يهيم بشوفتك يا حيلة يا جرحة
********
يم بابك أسجد بالدموع
طاري أسمك يترسني خشوع
وياخذني لأحزان الطفوف
وسحگ الخيل وذيچ الضلوع
أيظل ينزف جرحي المالة چارة
وكلشي أيجف ودموعي أتجارة
وابقة اذبل وتخيل مشاهد
هيچ أتمر أجواء الزيارة
أنسة الحچي،،،وأبقة أتأمل يامولاي الصار
بس البچي،،، يكشف من العاشگ مولاي أسرار
چا يمتة أجي،، بكيفك وانت الزوارك تختار
أخذ روحي اعلة شباچك حنين أنتة
التعذب من غربتة تشعر بونتة
*******
✏️حسين حمدان الدلفي
رد مع اقتباس
المشاركة الأصلية كتبت بواسطة حمودي القاسمي
