قصيدة لاستشهاد الامام موسى بن جعفر عليه السلام
محتار * بديار الغربه
محتار * واللوعة بگلبه
حزين همومه كثره * وحيد ايگضّي عمره
محتار * بديار الغربه
------------
محتار بديار الغرب والاحزان ** ودموعه دم هماله
آلام وهموم وآسي وأشجان ** صارت تلوح اگباله
ما بين ظلمات السجن والسجان ** ومگيد بأغلاله
آلام * گلبه الما تنعد
آلام * ناره الما تبرد
يعلمهه اعلى صبره * وحيد ايگضّي عمره
محتار * بديار الغربه
--------------
موسى بن جعفر بالسجن روحه تحوم ** شنهو اليسكّن روعه
ولا أمل يطفي نار گلبه المهضوم ** ويساعده اعلى اللوعه
تتكاثر اعليه الهموم بكل يوم ** واصبح يهلّ ادموعه
تزداد * كل يوم احزانه
تزداد * جمرة نيرانه
عليه ابحكم دهره * وحيد ايگضّي عمره
محتار * بديار الغربه
--------------
ابطامورة ظلمه اتغيّبت انواره ** متحيّر بآهاته
ما عرف بيهه ليلته امن انهاره ** وتشابهت ساعاته
بديار غربه السجن أصبح داره ** ظل يجذب ابحسراته
لوعات * تلهب دلاله
لوعات * لفراگ اعياله
او جِذَب حسره اعلى حسره * وحيد ايگضّي عمره
محتار * بديار الغربه
--------------
چم محنه چم هم يحمل ويتصبّر ** ما تنحمل أحزانه
لو نهض من محنه يطيح بأكبر ** يتصبّر بإيمانه
لو جبل هم چان انصدع وتأثر ** وتزلزلت أركانه
اعلى جبال * لو همّه تقسّم
اعلى جبال * تهوه وتتهدّم
ترك للباري أمره * وحيد ايگضّي عمره
محتار * بديار الغربه
--------------
مغصوب من سجن لسجن يتنقّل ** وعليه يشتد حزنه
بسجن ابن شاهگ أشد لوعه اتحمّل ** ضيّق عليه بسجنه
ظل صابر ليوم الفرج يتأمل ** يودّع سنين المحنه
بهل يوم * يتغيّر حاله
بهل يوم * تگرب آجاله
جمر يسعر بصدره * وحيد ايگضّي عمره
محتار * بديار الغربه
--------------
هل يوم گربت ساعته الموعوده ** واعلى الجسر أصحابه
عل جسر تتنطّر تفكّ اقيوده ** وتشم عبير اترابه
وافاهه لاچن رايح لمعبوده ** من بعد طول اغيابه
مسموم * وتگطّع چبده
مسموم * واروه بلحده
اوعليه بالگلب جمره * وحيد ايگضّي عمره
محتار * بديار الغربه
--------------
عقيل الكاظمي
رد مع اقتباس
