هنا

[ارجع يازمان]

أنصحك ياعراق...
:::::
ترى لمن تجامل ياهو الجان
تصير انته السبب بالسادي بينه!
؛
عفا الله بعد ماكو,,حاكم الخان
ترى كدام الايتام استحينه!!
؛
بعد لتصير ميت,,صير دفان
ميموت المشه ابزود المدينه,
,
عالمقصوده ابعد شَخص افلان
وبأسمه الثلاثي امشخصينه!!!
,
لتغلس على من جاب الاحزان
ماينضف كلب شال الظغينه,,,
؛
اذا جربنه ذاك الجان ,, غلطان
لعد طبنه مرض ,,كله امندينه!!
,
أنصحك ياعراق اتصير بركان
بوجوه الاجو عالوا علينه!
,
العنبر من تسعره ابسعر الِدنان..
ترخص كفة الجانت رزينه!!
,
ما دامك صكر لتخلي غربان
هيه اتفرهد ابخير اليجينه!!
,
مو انته الجنت للفرحه عنوان
شجاك وترضى بالدمعه الحزينه!!
,
رادو شعبك امن العوز ينهان!
لأن دجاله كضوها الخزينه!!
,
إذن سلم السفينه ابأيد سفان
ترى الما يفهم ايغرك السفينه!
ترى المايفهم ايغرك السفينه,,
حسين االساعدي