حياكم الله يالدرر ومساكم الله بالخير
سالفتنه اليوم عن شخص عُرف بحنكته وحبكته
بيوم من الايام صار يمنه حادث دهس راح ضحيته رجل له عشيرة كبيرة العدد ومعروفة، وبعد اللتيا والتي صار القرار فصل الميت،
صاحب الحادث لملم ربعه ووجاهته من الخيرين والساده وكان من ضمنهم الرجل اللي سالفتنه عليه اليوم،،
صارت الكعدة والديوان ضارب ع كولة اهلنه،،
اهل الميت طلبوا مبلغ 80 مليون كفصل عن الميت، والمبلغ مو هين وكبير جداا جدا،،
بدأت النقاشات والحوارات والجدالات وكل شخص يحجي سالفته من الخيرين يطيحوله حسب تقديره مليون او خمس ملايين او اكثر او اقل....
وصلوا المبلغ الى 40 مليون لكن بعده المبلغ كبير..
ف صاحبنه الرجل كان يعرف شلون يلم الحجي ويعرف شلون يخلي المقابل يصير لين وياخذ منه اللي يريده،،،
كاللهم عندي سالفه وي والد المتوفي واريده يسمعني زين، ابو الميت كاله تفضل اسمعك ابو فلان...
كاله بيوم من الايام جنت طالع للهور لوحدي اتصيد.. وكان والوقت قريب للغروب، وانه واكف ولن شخص وراي حاط سلاحه براسي،،
كلي منو انت؟ كتله انه فلان ابن شياع من كذا عمام!
كالي اعرف شياع واعرف عمامك بس انته ماعرفتك يجوز تجذب علي وانته بمكان قريب على ديرتنه وتريد تكتل واحد من عدنه،،
بس انه اعرف شياع ابوك صياد وعمامك فلان وفلان صيادين ومشهودتلهم واذا انت صدك ابنهم.. تشوف هذا الطير( الزركي) اريدك تصيدة وهو بالكاع قبل لايطير
ومثل ماتعرفون الزركي طير جداا حذر وبس يحس بحركة يطير...
كتله اي تدلل... نيشنت ع الطير لكن حس بيه اوي مدت راسه رميته.. كلي والله انت ابن فلان وانه اعرفك بس ردت اجربك والليله ماتروح الا عشاك يمي،،،،
فـ عمي انت ابو المتوفي، ابوك كان رجل كريم
واهلك كذلك معروفين بالكرم وناس اهل مضايف واصحاب نخوة والناس كلها تشهد الهم وانت اللي جاي تسويه مو من عوايد اهلك فـ اذا انت ابنهم صدك نريد نشوف كرم اهلك من خلالك وسلامتك..
ابو الميت خجل من كلامه كاله لا بالله انه ابنهم والتريده يجرالك وهاي الناس كلها طيحنه الهم 40 مليون وانت لوحدك الك طايحات 20 مليون..... انتهى
يعجبني الشخص اللي يحط النقاط ع الحروف
وكما قال مولانا امير المؤمنين عليه السلام الرجل مخبوء تحت طي لسانه
بالمناسبه الرجل كان شاعر وكان بسيط الحال من اهالي قضاء المدينة البصرة
وتحياتي
رد مع اقتباس
المشاركة الأصلية كتبت بواسطة نصرت القيصر
نورت
