تحية طيبة
سالفتي عن شيخ عشيرة معروف وفريضة كان بنفس الوقت ، كانوا جماعة الشيخ شايفين انفسهم وبس همه وبس وخشومهم مايكصها السيف ومتكبرين وكل واحد شاربه اليشوفه يكول يوجي عليه الصكر .....
باخر يوم من شهر رمضان وبليلة العيد واجواء فرح والناس تحضر للعيد ومتونسين ، توفت اخت الشيخ .. وصادف بهذا الوقت زوجة الشيخ حامل..
ومن صار الصبح الله رزقة بمولود. وكان مصباح العيد ، والناس قبل تجي تعايد الشيخ اول الناس...
عرفوا بان الشيخ ماتت اخته وصار عنده ولد ومصباح عيد... زين الناس من تروح للشيخ شنو راح تكوله عيدك مبارك ، لو عالخير بالمولود ، لو البقية بحياتك
.. بقوا ربع الشيخ محتارين وواحد يكول للثاني شنو الحل وشنو نكول للشيخ.. وتاخر الوقت وبعدهم ماداخلين عالشيخ.. بهالاثناء اجه ولد شاب وراد يدخل عالشيخ يعايده. الجماعه شافوه كالوله وين رايح ، كاللهم اعايد الشيخ كالوله هاي سالفة الشيخ . ماتت اخته وصار عنده ولد واليوم عيد ومحتارين شنو نكوله.... كاللهم سهلة هاي تعالوا وراي وشنو اكول انتم كولوا مثلي كالوله احنا ربع الشيخ نمشي وراك وبشورك وبرايك كاللهم جا حلوها بمعرفتكم وانه رايح لليشخ ، المهم سلموا امرهم بيد الشاب وراحوا وياه
دخل الولد ع الشيخ السلام عليكم ورد الشيخ السلام
كله الشاب...
عورة سترت وكان يقصد المراة الماتت. ودولة ظهرت وكان يقصد المولود . وعيد مبارك ...
جماعة الشيخ تعجبوا من الشاب وشلون حل السالفة بسرعة وهمه ربع الشيخ وتفوق عليهم بفطنته وذكائه
ــــــــــــــــــــ
الزبده من السالفه انك لاتشوف نفسك احسن من الناس ولاتستهين بغيرك ولو كان اصغر منك حجما وسنآ وعلى كولة اهلنا الحجارة الماتعجبك تفشخك
وكل شارب واله مكص اليكصه
وهواي من الناس من تشوفهم تكول بس همه وبس ولمن تجي الحقيقتهم تلكاهم فارغين من كل شي ايجابي وحتى حجي مايعرفون يحجون
والله بلانا بيهم بلوه وين مانروح نشوف هالنماذج واكثر مكان يتواجدون بي خلف الكيبورد ولقبهم ابطال الكيبورد
دمتم بحفظ الله
رد مع اقتباس
المشاركة الأصلية كتبت بواسطة sawsanmahmoud
