هنا

[ارجع يازمان]

خلصان العمر.
وباخر العصرات..
ماضلت دقيقه امجلبه بثيابي..
؛
اسمع بالفجر
تتهازم اللذات
ضليت ارتبي ومستنظر ابابي
؛
دولاب البسيط
ايخمد الاصوات
شو ماسكتاني وبلوه دولابي!
؛
ها باجر أكف
من ضحكة الشمات
بلكت عكب باجر واختم امصابي!
؛
طكني العوز طكه
ورادف الطكات..
بعت كلشي وكلاشي ابدمعة اعتابي!
؛
بعت البيت واثاثه
وبعت صفنات
وبعت المصلحه التوصلني باصحابي!
؛
بعت اشكد عزايم
واشكثر كعدات..
وضحكات أصدقاء ابساعة اغيابي!
؛
بس ضلت اشعاري
وفَشلت الابيات
ونكطة مستحه الموجوده بكتابي!
؛
مابعت الكتاب
وذكريات الذات
لأن بي ومضه حلوه ابطعنة احبابي!
؛
عفت عدلين يمي
ورحت للاموات
أدور احساس صافي وماهو جذابي!
؛
أراهن بالاموات
امراهن الحسرات
ياميت احسابه اليشبه احسابي!
؛
شفت ميت ابقبره
ايفزع الدمعات..
وسمعني نصيحه وبرد اعصابي,
؛
كالالي الحياة
التكضي بالعازات
اتقبل كفنها,, وارفض اثيابي!
؛
لو مثلك أموت
ابخنكة العبرات
وارفض هالحياة واعلن اضرابي!
؛
تعال الرحمة الله
واترك المأسات
أنسابك ماتفيد اشنفعت أنسابي!
؛
خلاني أعاتب
موتي بحجايات
جا هلبت تجيني وتطفي عطابي!
؛
مر دفان من يمي
وصحت صيحات
كل المقبره انهزت امن اسبابي!
؛
كال اشبيك !!
ماكو حرمة للاموات...
كتله المثلي ميت حاسب احسابي,,
؛
راح اشرب جكاره
وباخر الجرات
اريدنك ابسرعه اتهيل اترابي!
؛
كال ابلا ثمن!
ما تندفن هيهات,,
ماعندك افلوس اتكفي لاتعابي
ماعندك افلوس اتكفي لاتعابي!
حسين االساعدي

[Haidar Iraq]

عاشت الأيادي ..