بعسر غير النوايب فاتحت من،
وسهم غدرك بگلبي فات حتمن،
اكتلتني وجاي تنشد فاتحتمن،
ولاچنك رحت جناز بيه.
حسين صالح
مسعر موكدي وللحين ماطاف
بدليلي .. وشح وليفي تكول ماطاف
على الكعبة نبي ابراهيم ماطاف
بكثر طوفي اعله بيت الكطع بيه
عباس رحيم
ابفضايح فركَتك شنحوف ياهي...
غجر وبليل والطوفـــــان ياهي...
غرد شامتي ابشمـــــــات ياهي...
عروس الشيخ طلعت مــــو بنيه
جروحي اجناب موش اعضاي فنها..
عليها اتذكــــــــــرك اوماطيع فنها..
تجن وجروحي تـغـفـــــه ابليل فنها..
مصر وجنازة ام كلثـــــــــــوم بيه
عاصم عبد
بركت نوگي ولا تمشيش بالطاگ
ويروحي طوگاج الظيم بالطاگ
صرت حنطة وعشيجة تدير بالطاگ
سرح بيها الفكر وابلشت بيه
كريم الموسوي
إتهمل ما طاوعت عيني كراها
وأثر من سيلها خدودي كراها
دخت مدري بجفه أحبابي كراهة
إلي؟؟ مدري بجفاهم صوچ بيه ؟
ميثم الخطاط
ممـاشي الدهـر ياذني ويع من
عليه وخفت لايرحن عيـوني ويعمن
الويـع من غير راعيه ويع من
چـِذب گلمن يگول البيك بيه
للاهواز
أنتهينا وبعد گلبك لا يحبني
يمن رمحك بظهري لايح ابني
على كبري من اموت لائحة ابني
وعليها اكتب شنو شسويت بيه
انا ادري بيا سفاهه ودعتهم ؟ !!
و انا اومي بجف والاخر ودي اعتهم
ضواري اعله الغزالة ودعتهم
شتظن كلوبهم حنت عليه ؟
علي عامر
:يروحي شبيج ربعج ليش كشوج
مثل كش النمل بالكاع كشوج
اصيرن ورد ربعي تصير كالشوج
اصيرن شوج ربعي تلوم بيه
مدري لمن
الردي لو صاحبيته ابلاك وارداك
ورد تزرع ورجله اتدوس ورداك
اذا حبك وگال اهواك. وارداك
استعد للطايحات الحظ هدية
عدنان الغزي
طاسة ماي جب العمر جبريت
اعله حلي من التعب بالعين جبريت
ابشرنك صرت جن عود جبريت
اليخاف الليل يگضي الخوف بيه
فيصل المياحي
شمحل بشراك دهري علي تنحال
وصفت يوم عله يوم الروح تنحال
نخيت اللي بحضرته الحزم تنحال
يحل وحده من المعسرات بيه
ميثم الخطاط
هلا يا من سمه الله عليك تربا
معي بنفس السلف والكوخ تربا
هبل قنعته يسجد فوك تربا
ولا قنعت ابوك اصير أليه
احمد ألمطوري
علامك ماتشم عطاب للشاط
بدليلي وسوطك بمگفاي لشاط
توديني بضماي وياك للشاط
وتردني ردود نفس العطش بيه
ضياء الرويمي
يدنيا اكلي بشتل عمري وربعي
وعلى سفرة شبابي اثني وربعي
كلمن زامط بربعه . وربعي
حيايه رمل تتنافخ عليه
عدنان الغزي
يا نعنـاع نفس الـترف "يا هيل"
أظن عمبر لكـم شكواي "يـا هيـل"
اغـار اعلـيه غـيرة فرخ "يـاهيـل"
بحضن أمه يتمطرح شاف اخيه
ابواكرم الكريزي
شبده وخليت ضعنك سار
وگفه
بليل وفشلاني وجه
وگفه
وعلي ليلة جفاك خلصت
وگفه
بمجان البيه توايهنه سويه
كرم السراي
هله يـ المنحر سيوفك "بچاها"
هله يـ التفتهم حچيي "بچاها"
هله يـ الهجرك عيوني "بچاها "
هله يـ البسمك ينومون بيـه
ايادعبدالله_الاسدي
هلا يا سبب تعذيبي ولا عاي
وثمل من ساعة الشفتك ولا عاي
اشدهتني لا انت الساكن ولا عاي
ولا وياي لا مبعد عليه
عطا السعيدي
دفت بيدي المصايب مادفني
وضهاري الصيف كلهن مادفني
اخوي المتت يمه مادفني
ركض للدود دلاهن عليه
سالم الدبيسي
حمى گلبي وحميمه الله ،،يرحماه
طبر جرحك وَگول الله ،،يرحمـاه
امناموتن لاتگول الله ،،يرحمــه
الرحمة انت وگطعت الوصل بيه
عدنان البركي
وحق الي تكلم موسى وياه
البشر مثل الاصابع مو سويه
الاحبه جان جايب موسه وياه
جتلني ورد طلع جناز بيه
محمد فهد
طحت والطاح ينشد عن كبوته
انكبت صدري وشسولف عن كبوته
جبل ثور وحمامه وعنكبوته
ونبي وغار وقريش اتحود بيه
سامر جمعه
وكعت بضيج ما يرحم كساري
ولا ضلي عضم صاحي كساري
مثل طير وتلكته كساري
تخيل هيج صار الوجع بيه
احمد دلف
طار وما كلت للناس عطار
شسولف ع الجرح بلكلب ع طر
جنت وياك شايل خلك عطار
طفل ماتشتري وتلعب عليه
جبار رشيد
السره بيه تمنيته..... سره عليك
بطئ گلبي ولمن شافك..... سره عليك
تدري من شوكت لازم.... سره عليك
منهد ما جابو الخرخاشه اليهَ
سيد رفعت الصافي
الصبح لو ما وجود الله لحولاه
ليل بسبب صفناتي لحولاه
ومحمد لا بقت قوه لحولاه
أعجزت بحساب چم اصبع بأديه
احمد علي المنصوري
انتميت وي المواجع وانته مني
وحتى الناي ماخذ ونته مني
انه منك يحزني وانته مني
كاشخ بيك وتخبل عليه
مهند السيد هاشم
رد مع اقتباس
المشاركة الأصلية كتبت بواسطة ســـــجـــــودي ﹩ʝ☹
