هنا

[فقار الكرخي]

للضاگوه لذيذ الموت
للوگفوا رگب للسيف
گوم اذبح بيابي العين
اجالك من ضحكهم طيف
للماتعتگ صورهم
شذر ؟ ..مدري شمس ؟.. لو چنهه خبزة ريف ؟
گماري وموتهم بالكيف

للاختنگن جناسيهم من الدخان
للرادو وطن من غربة السلطان
للضحكوا على السجان
اجوا ..لمّة نوارس .. ورق دفتر .. بيييض
مافرزنهم الدفان
كتب فوگ الگبر عنبر بصف عنبر بصف عنبر
ووصى اولاده من يموت
اكتبوا اعلى السياسي ادنان

للأنطو عيدهم واخذو هموم الناس
للدمهم سهر من ناموا الحراس
الخبزهم ينشم وينباس
طين وصايغه التنور
للنگعت اساميهم من الكافور
وصفّوا ياس يتبع ياس
دمهم مالواه الموت
بشفاف الرصاص انباس

ابطال الرواية المارضت تنذل
الثچله الشايله المنجل
الحنينه الضاع فيهه ولونهه تبدل
نياشين الولايه القررت تندل
الانكاسرهم ويه الليل لو بردت اغاني الشوگ
وبموسمهم يطيحون برحي بسوگ
گوم وخم حزن روحك
بچي الدم اعلى دم يلوگ

محبرة الضمير الشطبت القناص
كحلهه بدمعة التاريخ

أثاري الدم رسايل تعبر التاريخ
طفينه الشمس .. من هب صباح الدم
خمر بالجنة ماينذم
صباح الماله صوت اظلم
كوم ارسم وسن بالعين
للطين اليحن للطين
من ضاعت شموس الناس
للساتر فزع تشرين
للانكتبت روايتهم بكل ساتر

وحگ دمهم
وحگ ذيچ القيامة وواقعة تشرين
وحگ العنبر الثاير
نرد كلما خذانه الموت
عاشر يندَه بعاشر







فلاح السالمي

[خالدالسعد]

روعة روعة

[فقار الكرخي]

منور يالغالي