اجروحي بالثورات حيل اتأثرن!!-حسين االساعدي
الله لا ينطيك هَستوهن غفن
ليش فززت الجروح الغافيه!
.
من كلتلك ما أريدك مارضن
هددني ابمشكله المو خافيه!
.
كامن ابنص الكلب يطافرن..
وشعلن ابناري القديمه الطافيه!
.
اجروحي بالثورات حيل اتأثرن
وكتبن اشعار ابوزن وبقافيه!!
.
كتبن ارحل والدموم اتناثرن
هسه كلها اوياي ما متصافيه!
.
اجروحي يردنك وحسبنك وطن
وانته كيعانك عليهن جافيه!!!
.
أنه ماصدكت توهن هودن
حرضَتهن كلمه منك دافيه!
.
ردت بس ينسن ولكن ما نسن
جربت ماكو الطريقه الشافيه
.
الجروح الليله ضدي اتحزمن
لو يهيدن ساعه كلش كافيه
.
اجروحي جانن رحمه هسه اتسودنن
انته خَبطت النوايا الصافيه!
.
بالدرب خطواتك الغيري مشن
وانه خطواتي الالك متوافيه.
.
روحي وجروحي عليك اتعودن
وانته روحك بالعشك متعافيه!
.
هسه اجيت؟ اتريدني اسهر وامتحن!
بالدموع الخذن كل العافيه!
بالدموع الخذت كل العافيه,,
حسين االساعدي
رد مع اقتباس
المشاركة الأصلية كتبت بواسطة مِـيهہرَمــآهہ ♬❥
