عاتبيني
روحي تعبها الونين
وكلفه احس من ما تجيني ...
عاتبيني .
روحي ساومها حزنها ..
ويا حزنها ..
ليل شاعر .. ضيع بغفلة وكت فرحة سنينه
وهيج احس ضاعت سنيني ..
يالتجيني ... وما تجيني ..
شوغة السجه مسافه ..
وحسرة الماله صدر .. ومضة برك ...
تشعل حسافه ..
***
الج بين اوراقي دفتر ..
والج بين ضنوني ضن ..
الليل شاخص شايل بأيده عصاته ..
شما يدك روحي يشك بير المحن ..
واني ادري البيج سر ..
وهوه سر ..
بس تعاي الما يطاوعني شكله ..
منين اروضله عذر ..؟؟
عيوني سود ..
تكتب بخد الوكت ذكره بعيده
وخلصت عيني حبر ..
بس تعاي ...
راح ابدل ( البس تعالو ) ابس تعاي
واحرك الروح بغناي ..
وراح اكلج ( حني .. حني )
شويه يا عين الغدت واهس بجاي ..
بس تعاي ..
اني اريد عتاب منج ..
حتى ما يكضه العمر .. ومضه حزينه ..
ثقفت طول القلم ..
يكتب عتاب ..
كون بس تعاتبينه ..
شكد ينطرج
فطر اطرافه المناطر
وصل عليه كلش حنينه
شكد ينطرج ..
وغيرج اشكد ناطرينه ...
***
يالشواطيج حلك يبلع مدينه ..!!
روحي شيوصلها يمج ..؟
بلم روحي ومو سفينه ..
وادري بيج بلايه حد ..
شما اطبش بيج اغرك يلي كل يومج كمر ..
ما بيج مد ..
هواي لاعبني الوكت لعبات توجع ..
واني ادري بلعبه جد
هواي باس خدودي دمعي
وما بقه بس تالي خد
هواي سيل الاه تجري بغير موسم
مالي سد
عود عاكول اني سدي منيلي سد
والعواصف اخذت الخيمه الاوتني وضلي بس في الوتد
وضاع ... ضاع
ضاع راس الخيط غفله
وهسه خيطي بلايه راس
كلها نادت .. كلها كالت
انته حطاب المدينه
واني شجره بخصري فاس
شافو مكابر ضحكتي وعودي اخضر
ما درو كلب الخضار اصبح يباس
***
وكاس ... كاس
نادمت ليل المواجع كاس ... كاس
طين حري وماي دربج
ما اصل ما بي مداس
( وعين .. عين )
تشوفج وما بيها عيني
عاتبيني

***
عاتبيني
حنطت لون السواد براسي خاف يطيح عيب ..
وريت عيب
شعري من حزنه لبس ثوب السواد
ولان نيتي وياج بيضه بكلبه شيب

عاتبيني عتاب سكته

وعدلي ادروب العمر كلها متاها
عمري يمشي بغير وكته ..
اني سالفتي طويله بجال صدج ..
خاف تنطك هيج فلته ...
وانعلج بحلوك شرها ..
السالفه الينطك علجها تصير نكته ..
**
وحيل خايف ..
حيل خايف ما تجين ..
ترتجف حتى الشفايف ..
وارد اكلج شمشمت نوحي الطوايف ..
اني ابن ديره تحب صوت الغريب وما تحب ... تغريد ابنها ...
عاتبيني ..
اليسكت ومحبوس دمعه يموت ذل ..
واليسولف علهوى بزحمة مآثر ينكتل ..
اني شب طولي بزمن كله ( اجتثاث )
والعدل لازم يقاضيه اليزل
ان شب طولي بعراق اللا عراق
والعد لازم يقاضيه اليزل
عاتبيني
وخلي اسولفلج على احساسي وشعوري
خل اكوم اكلب عبرتي
وازرع العبرات جوري
وخل اسولف كلشي اسولف
واشعل شموع السوالف
واشمر بأيدج صيامي
واكفر بدين العواطف ..
شكد حلف عني الزمان خل اصير اليوم حالف ...
خل اعيش بكل صفاتي ...
اني زوجني الوكت عبره ويه لوعه ..
واجن بنواتي مصايب ...
رايد أوئدهن بناتي ...
بروحي كل ذكره طلع بيديها اظافر ..
تكشط بعمري تعالي ..
وكرضي اظافر ذكرياتي ..
بس تعالي ..
والبسي بجفج حياتي ..
بس تعالي ..
وعاتبيني ..
وما يخالف لو وره عتابج مماتي ..
ليث النعيمي