( شعر عن الفراق )
وإفترگنه
وذبلت اصوات العصافير
ونزع ثوبه الشجر...
والسهر خطّار إجاني
توسد عيوني وگعد....
الليل ماچنّه هذاك الچان يتبده عله شعرك..
هجم بيت الليل أمس
هاثگله صار بثگل.... ماشوفك بعد؟؟!!
والنجوم التشع چانت ويّه عينك من تجيني
إستاحشت لون الضوه...
والأحلام التوهه لحگت
بطلت حته الغوه...
ورده بيضه بعيد ميلادك شريناهه سوه..
ويّه أول جلمة الله وياك ذبلت...
مونفسهه..
الضحكه ذيچ البالمطر نسمعهه چنّه
تحولت صارت بواچي
من وره الشباچ أحسهه...
والگمر مكسور خاطر
باهت وماينطي لون
وبيّن بوجهه السهر...
توني أريد أتوضه بيك
وصوت آذانك إجاني
يلله حي عله السفر......
ربي سترك قل أعوذ الليله من شر السفر.....
يمن چان بخدك يصيح الربيع
وتفز ورده
هسه ابشرك...
خيّم بروحي الخريف
يصيح ويرد الصدى
منين أجيب الصبح يمعود وأجيك؟!!
بروحي هيمه
ولاتصح گطرة ندى
میثاق الهلالی
رد مع اقتباس
المشاركة الأصلية كتبت بواسطة المحاميه شهد المعموري
