أمس زرت السوالف والمواعيد
بعدهن ع الجسر كلشي بمكانه
خطواتَك لهفتك عرگة الايد
خوفَك لا عيون اتطب سِمانا
ونار اشواگنه الما تقبل تهيد
وبير دموعنة وصحرة لقانه
انت گبال عيني وچنَك بعيد
اكيد ويَّ البُعد يكبر هوانه
وچفوفي ورگ غطة العناگيد
ولهينة ارواحنة ودارت رحانه
وصيني قبل لا أروح شتريد
گتلة الليل لا يخنگ ضوانه
وشوصيها السنابل ع الحواصيد !؟
لو اوصي الجرح يلچم دوانه !؟
لو اوصي العطش بالصيف ليزيد
وصية وغيرها وخلنة بعِمانا
بس عينك عليك وكلشي ما أريد
يمَك انتَ إلي مخَليك أمانه ♥️.
رد مع اقتباس
المشاركة الأصلية كتبت بواسطة هيڤـين
