إن كانَ لكم ...
لو منكم محمد چان اشگد تمجّد ؟
نسئل كلّ إلاديان
چا نكريتوا إلاحسان ؟
لو منكم محمد
چانت الدنيه حقيرة و ماكو للإنصاف قادة
والغني ابـأموالـه يحكم والظلم عالفقره عادة
بـالتَجـبُّـر والغَصُب چانت تنعِرف أهل السيادة
توحِش سَراديب الزمن
و چان الضعيف ابلا أمَن
حد ما إلٰـه الدنيه مَن
و ينبعث طاها ابقيادة
و طاغوت الرياسه يهتز من أساسه
الهاي النـعـمـه عنوان
چا نكريتوا إلاحسان ؟
لو منكم محمد
١
تمّت النعمه عليهم و نصّب الهادي وزيره
نَفِس ناس البايعتّه خانت ابعهده و غديره
هجموا الداره محمد بالحطب جازوله خيره
مـاراد منهم وابتِهَل
بس وصّه ناسه اعله الأهل
و تالي طغى عبد الجهل
و كسّر اضلوع الأميرة
وايجازي نَـبـيّـه من ضلع الزچيّـه
نحچي ابمعنه وجدان
چا نكريتوا إلاحسان ؟
لو منكم محمد
٢
اشگد سعه الهادي ابنبوته اينجّي ناسه امن الحقارة
بس مقابل سعيه وسفه چان يـرمـونـه ابحجارة
تالي نفس الناس ذولـه اتصارعوا لجل الإمارة
لن كل حجر صابه ابألم
ابنعش الحسن صاير سهم
ابن الرسول ابچبده سم
والرّمي ابنعشه جسارة
يا ملًـه و ديـانـة
تقبل هالخيـانـة
نسئل اهل إلايمان
چا نكريتوا إلاحسان ؟
لو منكم محمد
٣
نسئل الأديان كلها الربنـه جاعلها مَكينه
من يهود و من نصارى و صابئه و كلمن يقينه
هم طغوا هيچ ابنبيهم حاربوا اهله و بنينه ؟
كل أنبِياء الله ابشِكل
شافوا مُعانـاة و ثِقِل
لاكنها ماحملت مِثل
ما حِمَل طاها نبينه
لو طاها نبيكم هيچ اتـأذّه بيكم ؟
عدكم مثله إنسان ؟
چا نكريتوا إلاحسان ؟
لو منكم محمد
٤
إن كانَ لكم ...
تمت بعون الله المنان
هدية لقلب صاحب الزمان (عج)
ارجوا القبول بِأحسنَ ماكان
السيد نبيل الموسوي ...
٢٣/صفر / ١٤٤٣ ه.ق.
رد مع اقتباس