سيرةُ النـار ...
(عيسىٰ الجَلُودي)
أحد قائد قوات هارون الرشيد
ارسله اللعين ليهجم و يهدم بيوت العلويين
و منهم بيت الامام الرضا (ع)
فأمر بالحطب و احرق دار الامام (ع)
واما القصيدة :
أمـي الزچيـه و حزنهـا ابوجودي
و حرگوها داري ابأمر من جَلودي
اعلينه المصايب عديده
و نار التشب مو جديده
حرگوها داري ابأمر من جلودي
من أُمَر بيها الـ(جَلودي) و هدّت الگوم
نهبوا امن ابيوت أهلنـه حتى إلهدوم
آنه وارث نـايبـات الزهره لليوم
امن الزمن مظلومه أمي و آنه مظلوم
حرگوا الدار بس فرق صار
ماكو بسمار يسفك ادموم
آنـه ابصلابـة علي و ما رعوني
لاكن مثل جـدّي مـا چـتّفونـي
نـاس التضدنـه عنيده
و نار التشب مو جديده
حرگوها داري ابأمر من جلودي
١
هذا آنه ابن الخليل و ناري تزغر
(كوني برداً) خاطبتها اشلون تسعر
مانَعتهم لا يطب البيتي عسكر
و مو مثل جدي علي للمسجد انجر
بس أبواحسين اموصّه بالحين
امچتَّف ايدين وهوه حيدر
ماكو وصيه اعله ذمتي قرينـه
و مثل الفدك غصبوا اشما بدينه
ويلي اعله أمي الشهيده
و نار التشب مو جديده
حرگوها داري ابأمر من جلودي
٢
من عگب ما شب حطبهم ، حرگوا الباب
واگف اگبالي الـ(جَلودي) و تضحك اجناب
حامل الدستور و جاي الداري سلّاب
يسلب اشما عدنه مال و حتى إلثياب
و گتله بالروع بيتي ممنوع
منكم اتلوع العيله ترتاب
واشما نِملكه جِمعته ابرزيتي
گتله إخذ وانصرف ، عوفه بيتي
و سِلمينه من هالمكيده
و نار التشب مو جديده
حرگوها داري ابأمر من جلودي
٣
هجموا ابوسط المدينه و كلها ظلام
سلّبوا حتي الحَرم ، ما كضهم اسلام
رَد علينه الطف مِثل زينب وِإلايتام
نهبوا ابيوت الهواشم مثل إلخيام
العمتي ياويل هجمت الخيل
امن الزلم سيل صبوا آلام
آنه الرضا اويه الحسين ابقَرابـه
نـلت الإمامـه و شبهته ابمصابـه
دوم النوايب شديده
و نار التشب مو جديده
حرگوها داري ابأمر من جلودي
٤
سيرة النار ابتدت من فاطمه انشوف
و فوّرَت حقد العده و طلعت بِـإلطفوف
اعلينه لو سم لو حَرگ لو سلّوا اسيوف
و وصلت النار اعله بيت الصادق اتطوف
نـار إلَنذال الصادق الآل
اببيته لعيال فرّت ابخوف
واببابه نار الحقد هم حِوتهم
و هسه وصلني الحرگ واذكَرِتهم
سيرة مِحنّـه مديده
و نار التشب مو جديده
حرگوها داري ابأمر من جلودي
٥
اشكرالله العظّم اجري و هوّه باري
بالرضا سمّاني راضي ابكل مَراري
صح إجت نار الحقد حرگتلي داري
لاكن ابهاي الله عوّضلي ابمزاري
انطاني أضعاف گبري ينشاف
اتزوره آلاف و حبها جاري
ابسيرة حرگ حارِبوا مستوانـه
و ربنه اليخلِّد ذِكِرنـه و حِيانـه
سيرتنه سيره رشيده
و نار التشب مو جديده
حرگوها داري ابأمر من جلودي
٦
سيرة النار ...
تمت بعون الله المنان (عز)
هدية لقلب صاحب الزمان (عج)
أرجوا القبول بأحسن ماكان
سيدنبيل الموسوي ...
٢٨/صفر المظفر/١٤٤٢ ه.ق.
رد مع اقتباس