رجال شايب من اهل غماس كلش جبير وعنده امراض قلب وسكر وضغط وميقبل يترك مشاية الحسين ع فكلوله الناس حجي انت شكد صارلك تمشي كلهم صار 50 سنه امشي بكل شعبانيه واربعينيه وكل زيارة متفوتني كلوله جا حجي بالعافية عليك بس كافي مو زين عليك كلهم لا بويه (الضايكها ما يملها) كلوله شلون؟ كلهم بويه يوم من الايام طلعت وباقي عن الاربعينية خمسة ايام وجنت تعبان كلش فوصلت شويه عن الشارع العام وطحت وشالوني رجعوني ولدي للبيت وكلولي بويه بعد متروح لان تطيح بالطريق، وبقت 5 ايام عن الزيارة واني افكر واكول شلون جا زينب ياهو يتلكاها افكر بزينب ع، يكول اتخيل بس اني اتلكه زينب ع بالاربعينية مالي علاقه بالوادم اهم شي اني اتلكاها فظليت بالليل افكر اخر شي كلت خل اطلع وين ما اموت بالطريق ميخالف المهم اسوي العليه، فبالليل كلش طلعت عالبساتين مو عالشارع العام حته محد يلحكني ويرجعني وكمت امشي بسرعه الى ان صار الفجر حسيت بروحي كلش تعبت وابتعدت اني بس مادري وين صرت ولا اندل الطريق الصح منين فطحت والتفيت بعبايتي واريد اكوم ماكدر فكلت ابو علي هسه مادري من يا جهه انت بس هاي طاقتي وهذا الاكدرله فسلمت عالحسين ونمت، واذا احس بضوه قوي صار عليه واسمع طكت رجل فرس، وكلت بنفسي اني مانمت مامعقوله هاي شمس فرفعت العبايه شفت فرس وراكبه فارس كله نور باوعت يمنه يسره بعده الجو مظلم يعني بعده الليل وهذا النور كله من الفارس، كلي حجي يالله كوم كتله ماكدر اكوم كلي لا حجي كوم كتله والله ماكدر اكوم انطيني ايدك، كلي(اني ما عندي ادين) حجي جلّب بالفرس وكوم فجلبت بالفرس وكمت فشفت الريشات ع راسه فعرفته هذا ابو فاضل
كلي شجابك هنا؟ كتله والله اني رايح ازور اخوك الحسين ع وتيهت وصار ليل واتاخرت وماعرف اني وين؟ كلي لا حجي انت ابتعدت هواي، عطشان؟ كتله اي والله مولاي عطشان، كلي دور من هاي الصفحه اشرب من القربه فشربت منها ماي بحياتي ماشارب مثله، كلي حجي دور وجهك هيج فدرت وجهي وحسيت بشي دفعني بظهري ما حسيت اله اني كبالي نهر زغير وشارع عام تمشي بي المشاية فعبرت الشارع واكو موكب يخدمون بي طبيت كتلهم بويه اذن؟ كالو اي حجي اذن، فسالتهم بويه هسه احنه بيا منطقة بالضبط كالو هاي كنطرة السلام ( بنفس الليلة وصلوني من غماس الى كنطرة السلام) فدخلت اصلي ورة ما كملت مشيت صار الجو بارد كلش وهم اني ما نايم فكعدت ادور موكب انام بي وكل المواكب مليانه وماكو مكان الى ان حصلت موكب شويه اكو مكان بين الزوار فحصرت نفسي بينهم نمت وتلفلفت بالعباية، صار الصبح كعدت لكيت واحد يبجي يمي ويصيح هنيالك حجي(ويناديني باسمي) فكتله بويه انت منين تعرفني؟ وليش تبجي؟ كلي حجي فلان اني ابو الموكب الفجر جيت هنا شفت مرة كاعده يمك كتلها خاله هذا الجادر بس للرجال شعندج هنا؟ كلتلي اني جايه لحجي فلان هو هسه بردان وجايه اغطي هذا جاي يزور وليدي الحسين ع فعرفت هاي الزهراء ع هنيالك يا حجي فكعدت اني هم ابجي كلت مولاتي يا زهراء انتي تجين ع مودي مولاتي، وخابرت ولدي كتلهم بويه تعالو اني بكنطرة السلام فكلولي بويه شوصلك بهالسرعه؟ فكتلهم تعالو ، اجوني ولدي نزعنه (تكرمون النعل) ومشينه حفاي للامام عليه السلام((ياابا الفضل معجزتك يامولاي))
#منقول
رد مع اقتباس
المشاركة الأصلية كتبت بواسطة الرميثي
