أنا راس حسين .. دمه تبچي العين
ابو فاضل وين ؟ .. يا زينب
_____________________________
إذا عن الجسد خويه بعيد اهناكه عالضفه
وإذا عالرمح هذا اني واخونه الرمح الـبصفه
أظن يخجل تشوفينه بلا عينه وبلا چفه
كلما شلتي عينچ فوگ اشوفه ابرمحي يتخفه
وره شتم الناس .. غِده نار الراس
بچه دم مرتين .. يازينب
_____________________________
يزينب راس أبوفاضـل يريدچ ماتشوفينه
اشما صرتي قريبة إنتي يغمض عالسهـم عينه
يظل الرمح يگطر ماي يعـرگ من تحاچينه
أكثر شي يجرحه أثنين أنتـي ودمعة اسكينه
منو يسوه عِتاب .. ضوه عينچ غاب
وفه ذاكه الديّن .. يازينب
_____________________________
وآنه إعله الرمح مشيـول وسياط العده أذتنّـي
صحت لو باقـيتلي امتون چا وديت إلچ متنـي
بس ماباقي شي تدرين خـَيل وناس داستنـي
آنه غالي شرتني اسيوف بيها اسيوف باعتنـي
منو مثلي انباع .. صفه دمه اشراعه
غله عالجهتين .. يازينب
_____________________________
إذا شيبتيّ تنعذرين العزيز إيشيبّ افـراگه
ما متعودة عالهجران متعودة إعله المـلاگه
انتي ويانه رمش وعين يمچ وانتي مشتـاگه
تهتز ع الرماح الروس كلما تعثر النـاگه
إذا محمل مال .. سمه ماننشال
على چف جيشين .. يازينب
_____________________________
من انشوف الهزيله انميل حتى ارماحنه ايميلن
نخاف الناگه تعثر بيچ وبـنياتچ إيطيحن
جزيرة ومنهن أشتلگيـن! إذا منّ يـَمچ إيضيعن
خرزات وبدون الخيط سبحة امطشرة إيصيرن
نده فوگ ورورد .. وأبو ماموجود
خذه كولشي البين .. يازينب
_____________________________
بعيوني چبيره اهواي حتى من الزمان أكبر
إنتي زينب أم الخير مايگدر عليچ الشر
حتى الحبل چان ايصيـح معقولة الشمس تنجر !
ماتبقى إعله هذا الحال دنيه وبالعكس تفتر
تره مو للدوم ..اكو لا بُـدّ يوم
يجي بيّ نصـرين .. يازينب
_____________________________
وعيونچ دمعتـچ هاي دين ويفهـم العاقل
عندچ شيعة ماينسـون بيهـم غيرة الكـافل
إذا واحد رجع يسبيـچ يفزعلچ حشد كامل
فدوتچ كلهم ايصيـحون عونچ يـخت أبو فاضـل
يجي حشد الموت .. مشي قبل الصوت
انه ثار حسين .. يازينب
_____________________________
يختي وداعة العبـاس وانتي ودمعة العاشر
ماظن وحدچ اتضلين إذا تردين إلچ ناصر
مو واحد تجيچ آلاف مشاية الزلم باچر
عدنه الغايب الموعود غايب هـوَ بس حاضر
تره عنده اخبار .. دره باللي صار
يجي صاحب ثار .. يازينب
_____________________________
كلمات الشاعر - أحمـد الذهبـي
تحميـلmp3
zhr
رد مع اقتباس
المشاركة الأصلية كتبت بواسطة طُهَرالْغَيم
