تبچون ونتم هسه شفتو گبورهم
احچولي عالخلص عمرها بدورهم
زينب ال هسه بكربله
ميته وبعدها مدللـه
بحضرة حسيني
(((())))
١
جيتولهم حضرة وذهب شمّة حرگ مابيهم
لاشفتو تل ولا جرح ولازينب تناديهم
ميتين بس ( وين اخوتي ) شما گالت تبچيهم
ماشفتو حيرتها بوكت… تدفنهم… تخليهم
بالحضرة كل ساعه ايتغير لونكم
لو عايشين الوحشه ذيچ شلونكم
لاشفتو نهران الدمه
ولاباچيه اعليكم سمه
من گد ونيني
(((())))
٢
كلما أشم ريحة حرگ تتسودن انه عيوني
وكلما يجي طاري العبي يصبح مثلهن لوني
وكلما ماشفت ضهر انحنى أهل الرحم شالوني
وكون اسمعت ضايع طفل چن عنكم ينشدوني
حتى اعله أهلنه نبچي احنه بطورهم
مبخوت مانحلف چذب بطيورهم
ياميت ايگلك هله
وترجع اديك محمله
غيرك حسيني
(((())))
٣
مأمنين عباس البطل موجوده يمه چفوفه
لاجيش أميه بكربله ولا تغدر أهل الكوفه
ماودعيتو كربله وچفوفكم مچتوفه
ترجعون من زيارته ووجوهكم معروفه
شفتو الذهب نازل يبوس انحورهم
ماشفتو ياهو الگعد فوگ صدورهم
وتذكرو هاي المسأله
كل واحد يرد الهله
ومحد يجيني
((((())))
٤
گلبي على گلبي يدگ يحسين قبل چفوفي
صح تبرد جفوني بدمع بس حارات حروفي
يوميه أشوفك تنذبح جرحت العين طيوفي
أبچي إمن أريد أشتاگله حد ما خفت من خوفي
بلكي وتطيح عيوني ويّه دموعهن
وكل عاشر ايمر ينذكر موضعهن
دمعاتي بالطف مؤمنه
تسجد على ترابك سنه
ياماي عيني
(((())))
٥
تبچون ؟ إي نبچي بعد حد مايجي مهدينه
ومو نسكت إنگله إشجره وبنضرته إيبچينه
ونجيب ماي من الكفل عطشان گبر سكينه
وناغي عبد الله بعلي ويطيب گلب حسينه
والمنتظر يقره أوراه انزورهم
والغيم يمطر مي ذهب لگبورهم
بلكي أستحق هالمنزله
وهاي القصيده أمسجله
بخدمة حسيني
فاضل حسن
رد مع اقتباس
...على راسي
