شو ساكته الدنيه شعجب
وماطايحه بيوت العرب
مو طاح عباس
وحسين عباس
وچفوف عباس
ويلاه يعباس
()()()
١
علي گبره انفطر وي گصة چفوفه
السمه بالگاع طخت رادت تشوفه
النهر جرف بجرف ظل تصفگ جروفه
وزحفت كربلا التچت على الكوفه
النجم يحضن بالگمر
الحد مانزل دم المطر
چا شنهي من ناس
غيرتها تنداس
ماعدها احساس
ويلاه يعباس
()()()
٢
يشرّبونك عطش وحچايتك خضره
أبمصابك كل أخو اليوم إنحنه ضهره
تون أم البنين وتنشغ الزهره
الهلال إنحنه وتتلثم الگمره
ضم وجها خجلان الورد
والماي ظل يمشي ويرد
يمحير الماي
يلوحدك هواي
كل البچي شواي
ويلاه يعباس
()()()
٣
شيلم الحچي لو طولك تبده
يلمگعد المصايب وحده يم وحده
يعباس النهر عن زينب شبعده
شيصير الگلب لو مجعه يتوده
چا حتى عبد الله سلم
ومايرضع بنحره سهم
لاطاحت خيام
ولاگبري بالشام
بس غم الأيام
ويلاه يعباس
()()()
٤
شچم زينب بگلبك هيه بس وحده
أريد مرادي منك طايحه بشده
انحنه حسينك وريد بچفك تسنده
يعباس الزمان وياكم شعنده
ياسادة شيوخ العرب
صارت مضايفكم حطب
لاظلت رجال
ولافارت دلال
راعي البخت شال
ويلاه يعباس
()()()
٥
مسرفن بالحرب چنك شلت دله
وراك المرجله بيا إيد تتخله
مواقف غيرتك صلّت على القبله
اشوفن جيتك يابو الفضل سهله
مايوصل الساني الحچي
بس انعم الله اعله البچي
آنه أدري متعوف
ومتكضك سيوف
لو عينك تشوف
ويلاه يعباس
فاضل حسن
رد مع اقتباس