لاتسولفلي اعله وادم مايجون
خليها وي ربها التشد ارحالها
ظل وحيد ولاتظل عدهم رخيص
النجمة هم عاشت ابدون اهلالها
ناس تاكل عندي وتسولف وراي
ناس خربت حيل مدري شمالها
ناس احسنهم مثل نار المضيف
جبحه وتسود اوجوه ادلالها
صير ماي الخلگ من تعطش تجيك
اهواي وادم تحترم چتالها
وصير حية الحية هم مابيها عيب
موسى هاش ابجال الله وجالها
وره العافك ذب ضحك
لا تذب ماي
ووين مانوخت فل احبالها
انه مثل الساعه ماعرف انتظار
الساعه ماتنتظر حتى اميالها
انه شليّ برفگة الما يستحون
انه اريدن ناس گد افعالها
الشريفة احچيلها بلبس الحجاب
والكاوليه احچيلها ابخلخالها
انه امعود روحي بس عالغاليات
امدللة ومن تذل ماارضـالها
هيه صح العوز ماهداها يوم
لچن مارگضت وره المو مالها
نيتي گد ماصافيه يسموني ماي
الناس الترافگني ياهنيالها
مامسحت اچتاف غير اچتاف ابوي
ولاگلت للمو كفو خيالها
حكيم الفريجي
zhr
رد مع اقتباس
المشاركة الأصلية كتبت بواسطة نغم الجبوري
