هنا

[ღ عِشق ღ]

توادعنه ومشيت انته،
وبقت آنه حريجة ابنص صريفه
وداويه بسكته
مشيت انته وبقيت آنه مثل كتال
خايف مامأمن حتى من بته
ارجف مثل رجفة سعف بالعته
قلق مانام ، چن محكوم باعدام ،
اوبطت مُدتّه
مشيت انته وبقيت آنه ابفشلّ روحي
مثل عريس ماتت أُمة وي زفته
ومشيت انته بوجه فرحان
چنك عاشگ وماخذ صويحبته
وانه ظليت لا گلبي عرفّ علتي
ولا انه اعرفت علته
وانه ظليت لا توبتي گلبي ولا اني توبته
وبقينه بحول غرگانين حد الراس
لا طلعني هوَ ولا اني طلعته
بقيت انه بطرگ روحي
عگب ماچنت ذاك آنه العزيز الكلها رايدته
عگب ماچنت آنه ذاك الطويل
الراهي الأسمر والضحك عالليل
ونسوان السلف ياصاح عاشگته
ياوسفه والف وسفه وندامه وآخ
آنه اليبقه يم بيبان طاردته !
آنه اليضحك ويه اوجوه بايعته !
الف وسفه وندامه وآخ
آنه مستغرب من الصار
امس صافن وگلت الآنه خايف
شنهي هذا انته
هذا انته
مشيت انته وبقه رسمك
أنه لوموش رسمك بس تروح انساك
بس تروح انساك
هسه أحنه انتهينه وكلشي اخذته اوياك
چا رسمك عليش اوياك ماخذته
عمر واعله الليالي السود وزعته
صبر مابين غيظ وضيم، خلصته
عساك اتعيش هذا العاشني وعشته
عساك اتطيح كون ابضيج
لا ربك يطلعك منه كون ولا العابدته
عساك اتضوگ مر ماضاگته الوادم،
بحيث أيوب ينزلك
يگلك هذا مرك آنه ماضگته
عساك اتطيح كون ابـبيـر
يوسف يفك حلگه اعليك
وكون الگاع تنشگ وتكض رجليك
واسمعنك تگلي ادخيل
بس خليني اچلب بيك
ذيچ الساعه تبرد نار گلبي اعليك
واسولفلك على اهمومك،
على اجروحك، على وعودك،
يچذاب البعتني الناس
مايسوون اضفر من اصابيعي
هم اتطيحك الدنيا وتجي البابي
وأگل الروحي يالله شلون ماباعچ
بعد بيعي ،
ولچ بيعي


حكيم الفريجي
zhr

[نغم الجبوري]

الله مبدع حكيم
شكرا الج