قصیدة:حیل توجع
ـــــــــــــــــــــــــ ـــــــــــــــــــــ
هیّه حسبه وحیل توجع یاحسین
أمنـین أشــوفـلي درب للأربعــین
گالـوا أنســد الــدرب من الـوباء
وآنه اگولن کل علاجي ابکربلاء
حیل توجع یاحسین
ـــــــــــــــــــــــــ ـــــــــــــــــــــــــ
حیل توجعـني أمن اگـولن مااشـوفک
وما أمد ایدي اعله شبّاچک و اطوفک
یلّي متــعوّد مشــي اوصــل طفــوفک
کلشـي اعـوفن حاضر وبس لا اعوفک
والله تــوجع مـن اگولن مااروح
هاي عامین انتظر ماعـندي روح
گالوا ابحـجة مرض هـذه البقاء
وآنه اگولن کل علاجي ابکربلاء
حیل توجع یاحسین
ـــــــــــــــــــــــــ ـــــــــــــــــــــــــ
احنه مختنـگین الک وانتـه هوانه
هاي عامیــن النفــس خالي مکانه
الگلبه مامحروگ یجرحنه ابلسانه
ایگول لیش احسین ما ودّه ورانه
عد بعض ناس الجهل صار اعتقاد
گالــوا الیــدخل حــرم بکـرونا راد
واحنه نعرف زین بترابک شفاء
وآنه اگولن کل علاجي ابکربلاء
حیل توجع یاحسین
ـــــــــــــــــــــــــ ـــــــــــــــــــــــــ
التــوجع اکثر یاحسـین اترکها عندک
اتشوف مشایه اطلعت بس انته بعدک
کلهــا تســأل ها تــروح و شنــهو ردک
تمشي ناوي اویه الربع لو ناوي وحدک
هاي عامین انسئل بس هالسؤال
هم بعــد نسمـــعها یالــزایر تعال
هلــه بالـــزایر هلـــه احله نداء
وآنه اگولن کل علاجي ابکربلاء
حیل توجع یاحسین
ـــــــــــــــــــــــــ ـــــــــــــــــــــــــ
الحلــوه بیک الما یعرفک هم یحبک
ینتظرها ایامک ویمشي اعلـه دربک
محّد ایحب التعب بس نهوی تعبک
ویـن الله الأربعــین انصــیر قربـک
عن علیــنه الي یــوزّع بیده ماي
والیصیح اشرب یزایر یمنه چاي
اشلون ینسه وگلبي یحمل هالعناء
وآنه اگــولن کل علاجي ابکــربلاء
حیل توجع یاحسین
ـــــــــــــــــــــــــ ـــــــــــــــــــــــــ
آه من تعــب الــدرب وکــت الزیاره
ایروح کل تعبک من اتشوف المناره
یاحسین ابلا حســین الکل خساره
فدوه اروح الشــیبتک سویلي چاره
ما أمد ایــدي اعله غـیرک یالحنین
أکتب اسمي اویه التجي بالأربعین
خل اطب الحضره من باب الرجاء
وآنه اگــولن کل عــلاجي ابکربلاء
حیل توجع یاحسین
ـــــــــــــــــــــــــ ـــــــــــــــــــــــــ
یلّي ذبحوک ابعطش نصرخ دخیلک
والله عدنا اگلوب عطشـانه تجیلک
سهم المثــلث رمـاک و أخـذ حیلک
هسه سهـم افراگک امصوّب خلیلک
والله لو نزحف زحف فوگ التراب
مانــواسیــلک جــرح مــن الــرباب
منــک انرید الزیــاره والعــطاء
وآنه اگولن کل علاجي ابکربلاء
حیل توجع یاحسین
ـــــــــــــــــــــــــ ـــــــــــــــــــــــــ
کلمات خادم الحسین ع
عبدالامیرالناصري...المحمره
رد مع اقتباس