السلام عليكم
راح نكمل الجزء الثاني من موضوع رائحة الفم واسبابها وسلوك الفرد اجتماعيا
الي ما قرأ الجزء الاول موجود بالصفحة قبل هذا الموضوع مباشرة
تكملة الأسباب
٤. بعض الأدوية الي تؤخذ بدون ما تقرا تفاصيل الدواء
بعضها تسبب جفاف الفم وبالتالي راح تسبب لك هاي الرائحة كما لو كنت صائم
٥. عادات سيئة مثل التدخين الي يعتبر اساسي بهاي ال المشكلة وفوكاها مشاكل غيرها مثل التهاب اللثة وايضا تأثيره على بعض الأمراض الفموية واخرى خاصة بتأثير التدخين على الخلايا
٦. مشاكل في الأنف او اللوزتين او الجيوب الأنفية
وهنا اكيد التهاب اللوزتين واحد من الأسباب الرئيسية لهاي المشكلة خصوصا اذا صايرة الحالة مزمنة وتتكون كتل دائما بيضاء هاي تصير مغطاة بطبقة من البكتريا تسبب الرائحة
أيضا إصابة الشخص بالانفلونزا او التهابات في الجيوب الأنفية وغيرها
٧. مشاكل في المعدة وهنا تصير مشكلة بالمعدة تكوم ترجع الأحماض بشكل مزمن وتصير رائحة جدا كريهة ولازم تعالجها
قبل لا انطلق بالعلاج خلي نحجي بالسلوك الاجتماعي
عيني خلي يكون عندك شوية حس بنظافتك ونظافة فمك
يعني مااعرف شلون مقتنع ومقنع روحك انه تلتقي بأشخاص بهيج مشكلة بدون ما تفكر اصلا تعالجها ( حط جواها خطين لان المحاولة كفيلة بتقليل المشكلة )
او ماادري الصراحة شلون تبقى يم زوجتك بدون ما تهتم باسنانك ،
بعض المراجعين من تسألهم ليش يابه ما تهتم وتعالج يكلي دكتور وقت ماكو او ما ألي واهس او ملتهي بالشغل
زين حبيبي فهمني هي شكد تحتاح وقت حتى تنظف اسنانك؟ ٥ دقائق من ٦ ساعة على اعتبار حتنام ٨ ساعات
وهم فلوسها بالزايد ٥٠٠٠ دينار وتجي بعدين صايرة المشكلة عندك وتسوس لا وفوكاها متروح للطبيب الا واصل المشكلة للعصب والألم واصل لام راسك وتبجي الليل ومتنام بس كله يبقى صوجك ما خصصت ٥ دقائق يوميا
العلاج
بالنسبة للعلاج راح نخلي مبسط
١. اهم شيء التفريش مرتين وضروري ضروري التفريش قبل النوم
٢. استخدم خيط اسنان ضروري حتى تشيل الاكل بين الاسنان وهاي تسبب الرائحة
٣. تروح لطبيب الاسنان تفحص أسنانك اذا بيها مشكلة صلحها حتى لو ببدايتها ( كل ٣ اشهر إلى ٦ مراجعة )
٤. تروح تعالج المشاكل الي كلناها فوك سواء مشاكل الأنف او اللوزتين او المعدة
٥. تسوي كل ٦ اشهر جلسة تنظيف اسنان حتى ترجع أسنانك هم بيض وهم تشيل التكلسات وهم تبقى نظيفة
٦. هاي النقطة الي اسمعها من اغلب المراجعين انه يابه اذا فرشت حتى لو يطلع دم عادي ٩٠% عندك التهاب لثة ودم محتقن لتعوف التفريش بسبب هاي المشكلة مثل ما اغلب المراجعين يكلوها
٧. تغيير فرشاة الاسنان كل ٣ اشهر او اقل اذا شفتها مستوية
ولهنا خلصنا الحجي
بلكي تستفادون
ياريت شير للمنشور
تحياتي لكم
د. نصرالدين اكرم الربيعي
بكالوريوس طب وجراحة الفم والاسنان
رد مع اقتباس
المشاركة الأصلية كتبت بواسطة احمد الگرعاوي
