سالوفة
سالوفـة
ــــــــــــــــ
يگولون .. بقديم الزمان چان أكو ضابط انگـليزي برتبة رائد ( ميجــر ) هو ومجموعة من الجنود يطاردون واوي وشاءت الصدف بـأن يدخل هذا الواوي لأحد بساتين الشيخ گاصد اللي چانت علاقته جــــدا قوية وي الانگليز بوقت الاحتلال البريطاني ..
الميجر .. صاد الواوي ، وساعة السودة على هالصيدة الگشــرة لأن چان أكو راعي من رعيان الشيـــــــخ أعور واعــــرج إعترض الضابط وطالبه باطلاق سراح الواوي كونه من ممتلكات الشيخ گاصد ..
الضابط ماقبل وگله بما معناه أگــــــلب وجهك إنــــت والشيخ مالك وأخذ الواوي وراح لمقره بالمعسكر الانكليزي ..
وكعادة صغـــــار القوم وأراذلها .. راح هذا الراعي لمضيف الشيخ گاصد اللي چان بضيافتـه عدد جبير من شيوخ العشائر المتحالفة ويـاه ، ومن دخل للمضيف گال الابيات الشعرية التالية :
يگاصد يگاصد واوينه شنهو الذنب كضه ؟
تراچيه ذهب والطوگ من فضة
( القشمر .. سوه للواوي تراچي ! ) ..
چم ميجر بميجر من العنــگ ( العنق ) عضه ..
أها .. أهـــــا .. ميســـور لـ لنده يودونه .. ميسور لـ لنده يودونه .. يعني الانگليز اخذوا الواوي أسير الى لندن !
الهوسة حلوة ، والناس گامت تهوس ويه الراعي ، والشيـخ صار بموقف محرج گدام الشيوخ .. فـ گللهم گوموا اخوتي نرد الواوي ..
هجمـــــت الزلم على المعسكـــــــــر الانكليزي ، وكتلولهم ١٠ جنـــود انكليز واستشهد من العــــرب اربع زلم علمــــــود يرجعون الواوي اللي مالگوله أي أثر بالمعسكر ..
ولإحتواء الموقف .. المندوب السامي البريطاني ، اقترح أن يصـير لقاء عاجل بينه وبين الشيخ گاصد بمحطة قطار الحلة كمكان محايد ..
أثناء اللقاء .. المنــــــدوب السامي بدا منزعج ويحچـــي بنترة ، وطالب شيخ گاصد يدفع تعويضات لعوائل الجنود القتلى ..
شيخ گاصد ، گله لازم اشوف ربعي واستشيرهم بخصوص التعويضـات لان هاي المبالغ راح تندفع من العشيرة ..
العشيرة هم تريد تخلص من المشاكل ، فـمحد منهم اعترض على الشيخ ولا على مطلب المندوب السامي .. لكن منو اللي حچه واعترض ؟؟ اللي اعترض وعلگها مره ثانية نفس الراعي الاعـــور اللي طلـــــع وگال بصوت عالي ( دن ماننطي ورد واووينه ) وخله الزمايل تــــــــــرد وراه ( دن ماننطي ورد واوينه ) وياهه صياح وغلط وتهديد وطلقات ..
المندوب السامي من شـــــــاف الوضع هيچ ، خابر على لندن وگللهم تره الامور راح تطلع من ايدينه ، ورحمة للرضا دزولنه واوي شلــــون ماجان خلي ننطيه لذولي المخابيل ونخلص من هاي الشدة ..
رباط سالفتي اكو ناس لابالعير ولا بالنفير
تخبطها ويبتلي بيها العوارف والعوام المساكين
رد مع اقتباس
المشاركة الأصلية كتبت بواسطة ابراهيم حسن
