رائحة الفم واسبابها وسلوك الفرد اجتماعيا (الجزء الاول)
اذا تستفاد لا تنسى تشير الموضوع حتى الكل تستفاد
راح احجي بأسلوب عادي حتى الكل تفهمني واي سؤال حاضر
بداية خلي نتفق ماكو دخان بلا نار مثل ما دارج وهذا الحال بالنسبة لرائحة الفم
بعض الأشخاص عدهم هاي الحالة ومسوي اله عقدة نفسية والآخر عادي عنده بس متضايق من سبب راح احجي بعدين وبعض الاخر ولا يم السالفة (ميحس )
اول شيء خلي نعرف شلون نفحص انه عندي هاي المشكلة ،
اكثر من طريقة لكن الاشهر
١. واحد من اصدقائك او قريب الك يكلك بهاي المشكلة ( هنا ياريت تدارك الوضع لان زحمة حيل من تحجي وياه او ويه غيرك )
٢. تكدر تلعق او تنفخ على أيدك وتشمها وهنا راح تحس بيها
زين هاي بالنسبة شلون اعرفها
زين شنو أسبابها ومنين تجي
شوف عيني أسبابها هواي بس الأهم والأشهر كالتالي
١. طبيعة الاكل ونوع الطعام
اكيد ومن البديهي انه اذا تاكل بصل او ثوم او مثلا اكلة بيها توابل ، فأكيد هاي وره ما تنهضم تسبب الرائحة وتضل لازكة بيك ولازم تحاول قدر الإمكان تقلل من هاي السوالف قدر الإمكان او تسوي الي راح نحجي بالجزء الثاني مال العلاج
٢. مشاكل في الاسنان
اكيد الفم يعتبر الوكر الاول لهاي المشكلة لان هو مكان النطق وبالتالي وخصوصا انه هواي مشاكل منه فنقرا السلام
اول مشكلة وأهمها تسوس الاسنان
من يصير تسوس بسن حتى لو بدايته هذا يعتبر مصدر للرائحة ، خو اذا تقدم التسوس وتطور وانكسر السن هنا الرائحة تصير في ٢ على اعتبار راح يفوت اكل بالسن والبكتريا موجودة وهلا بالجوبي وتلعب لعب
وبعض الناس ولا يم السالفة والله ما عندي وقت انظف المهم
عامين البقية والاصدقاء بالريحة
٣. وجود التكلسات وايضا جفاف الفم
عيني الفرشاة والمعجون متكلف اكثر من ٥ الالاف وداعة امي ، يعني تكعد تحرك الفلوس على الجكاير و ممستفاد شيء ومتشتري الي يفيدك وينفعك واصلا يخليك محبب للناس ( فكر مو بس بنفسك رحمة لامك)
عموما كلما تلتزم بالتفريش وتعود روحك راح تحس نفسك غير انسان ، مرتين باليوم وره الغده وقبل النوم كلش كافي تسويلك هواي شغلات وأهمها تقلل تراكم الاكل وبالتالي تقلل التكلسات الي تعتبر سبب للرائحة
طبعا لهنا راح انهي الجزء الاول لان هسة متقروه وراح نكمل ببقية الأجزاء
ياريت اذا اكو فائدة تشير الموضوع
تحياتي لكم
الموضوع على صفحتي على الفيس وكلت انقله هنا للفائدة
د. نصرالدين اكرم الربيعي
بكالوريوس طب وجراحة الفم والاسنان
رد مع اقتباس
المشاركة الأصلية كتبت بواسطة فتاة الهدئ
