ياقراري.. ومن حبك سماري .. يامولاي
انته ثاري .. واحلامي ومزاري .. وحزن الماي
خطيت اسمك بجروحي
مذبوح الله ومذبوحي ❤️
ياقراري
ياخذني طيفك مشاي .. واصحى اعله باب اجروحك
مدري انته مذبوح الماي .. مدري النهر مذبوحك
ناشف الماي ولگيتك فايض
كلشي ميت وانته بالحب نابض
كلما كسر بيك فياي .. يكبر سمار بروحك
مارايح ودومك جاي .. يمنه ونحس انلوحك
اقرب النه من الورد انشوفك
وتمسح اعلينه ابحنان اچفوفك
خطيت اسمك بجروحي
مذبوح الله ومذبوحي ❤️
ياقراري
___________________________
ضامي وعرفتك نهران .. تجري بسوالف ناسك
ودم النحر يرسم چان .. شوگ الله بين انفاسك
ماچنت ضامي النهر ضامي الك
والله من بين الحجب يومي الك
انته البحـر والسفان .. روج العشگ عباسك
وراد الله نحرك قربان .. انطيته بالطف راسك
انته واحبابك نذر هلوله
شراد منك ربك وطحتوله
خطيت اسمك بجروحي
مذبوح الله ومذبوحي ❤️
ياقراري
___________________________
گمره اعله كل ظلمه اقراك .. يابو الشمس محلاتك
كلك ضوه وشيبك ذاك .. شايل فجر وجناتك
كل فجر خير وعشگ من لونك
وچانت احلامك نبي من چفونك
صورك تشد ذهني وياك .. واصفن واتيه ذاتك
وموش إلنه عينك لهناك .. يمكن على بنياتك
بالصور وعيونك اعله زغارك
يا نخل باگ الذبح جمارك
خطيت اسمك بجروحي
مذبوح الله ومذبوحي ❤️
ياقراري
___________________________
ذايب چنت حدر الخيل .. ماتدري حتى بجرحك
وي كل جدم چنت اتميل .. يسحگ عليك وتضحك
ملتهي بيمن چنت بالعاشر
ياسمه ماتدري بيك اشصاير
بعيونك امسامر ليل .. يم السبايه ايفضحك
وبراسك الريح تعيل .. يلچم ضحكتك روحك
ياضمه ابگلبك عثر وتوازه
وليش ياخير بذبح تتجازه
خطيت اسمك بجروحي
مذبوح الله ومذبوحي ❤️
ياقراري
___________________________
تعطش واخوك العباس .. ماي الوجود وسره
ولخدودك ايلوگ الياس .. موش الرمل والصحره
عاري والدم غطه بالطف عينك
وللضـوه مو للتراب اجبينك
اتموت انته وتعيش الناس .. هذا الحچي الما عبره
شنهي احنه خاطر تنداس .. طولك يفارگ نحره
فضل من انزورك اتخلينه
يمك ونشرب ماي مدري شبينه
خطيت اسمك بجروحي
مذبوح الله ومذبوحي ❤️
ياقراري
___________________________
حزنك ربه بزغري اوياي .. صار الحزن مثل اسمي
عالفطره هالحب مولاي .. من گلبي يحري بدمي
حسين ليليه ويه حزنك ساهر
وصدري كلش مستحي من الحافر
ناغتلي بيك امي هواي .. وشگد نعت بيك امي
گالتلي من تشرب ماي .. بسم الحسين اتسمي
منها وانه اعله النهر ماراضي
چبدك من العطش بالطف گاضي
خطيت اسمك بجروحي
مذبوح الله ومذبوحي ❤️
ياقراري
___________________________
للشاعر : حسن التُـرابي
mp3
Z
رد مع اقتباس
