في أوسع سفينه .. عِـشاگ اجينه
والبــاري يرعانه
يامـوج اليصـدنه .. والـغيـرة عـدنه
ونشـوفك اويـانـه
إحنـه ابكل فخـر با نـاس
نـرفع رايـة العبــاس
توكلنا على الله من نـوينه انشد عزمنه
قسم بالانزع الما يـدبر بحـربه قـسمنه
اخذنه من شيم انصار ابواليمه شيمنه
ندافـع عن مبادئنـا وعن شـرفنا وعن قيمنا
وعلى حُـب الحسـين اتوحدت كلمة زلمنه
رغم انف الزمن مـايـوگع وعالي علمنه
والـ هذا إعـتقاده .. صـاح ابـ إراده .. تتحقق أحـلامه
والعاهد أميره .. يعرف مصيره .. مازلت اجـدامه
صاح ابسـاحة النـوماس
نرفع راية العبــاس
تره الذلة تعب مابيها موجودة ابسهوله
لچن من الـرجل تسرق أثـر معنى الرجوله
زرعنـه وكل زرع من يرتفع فخره بأصوله
طموحك لو تريد الغايتك تضمن وصوله
على حب النبي وآل النبي مجدك تنوله
بعد واسمع كلام الطايعه لله ورسوله
والخان الأمانه .. احذر لسانه .. وليغرك اعلامه
والرايد يذلك .. رايح اگلك . معدودة ايامه
لا شـكًا ولا وسـواس
نرفع راية العبــاس
سفيـنتـنـه العظيمه الرفعت اشـراع السلامه
عليها انكتبت اسماء النجاة أكبر علامه
إذا رايد شـفاعة فاطمة ابيـوم القيامه
بعد عهد النبوة اتمسك ابحبل الإمامه
وحق من سـلبوا اثيـابه وبعد حرگوا خيامه
نضل نبچي على امصاب الارامل واليتامه
ياهو اللي كفلها .. من بعد أهلها
مسبية عافوها
مأسـاوي وضعها . . ويهل دمـعها
للكوفة ودوها
اتنـازع بآخر الأنـفاس
نرفع راية العبــاس
يناعي بالله سـولف عن مصيبتنه العظيمه
بدايتها المُهر من عـود ابصوت الظليمه
إجه وجايب خبر للعيله عن ابشع جريمه
يگول ابدم جبهته اتخبضت الشيبة الكريمه
يحوم إعله الخيم خوف ورعب ماخله خيمه
مثل سرب الحمام وچم يتيم وچم يتيمه
وشحال العقيله .. وهيه الكفيله
وإبـن امها وصـاها
ونـحرگت خيـمها .. ابـذبحة زلمـها
ولا والي ويـاها
راح الإسمـه رفعة راس
نرفع راية العبــاس
إذا يسألنه منصف عن مواقفنا الأبيه
نگله احنه امتداد الكل رجال الغاضريه
قضيتنه على خط الحسين افضل قضيه
طفينه ابدمنه نار الوجرتها الطائفيه
ابعقيـدتنه وتمسـكنه ابوصاية المرجعيه
جمال الحب عراقي اتخلد بـ أنبل هويه
والضحه ابحـياته .. ضامن نـجاته
شاهد يضل دوره
والضل عالشريعه .. چفوفه گـطيعه
ماينطفي نـوره
لليوم الگمر نبـراس
نرفع راية العبــاس
توم انولدت اويانه النجابه من انولدنه
مثل موت النخل لمن ايموت احنه بعدنه
تعاهدنه نضحي وساعة مانخلف عهدنه
عقيدة عابس ابحب الحسين احنه اعتقدنه
على اعدانه ابنصرنه الخالق اكـتابه وعدنه
يضل سور العقيده وحارس المذهب حشــدنه
وبهمة رجاله .. نخسر مُـحاله
ويه اليـلاوينه
مادام انتصـرنه .. لا مايضـرنه
كلمن يـعادينه
نبقى نقـاوم الأرجـاس
نرفع راية العبــاس
كلمات الشاعر - السيد سعيد الصافي الرميثي
zhr
رد مع اقتباس
المشاركة الأصلية كتبت بواسطة ســـــجـــــودي ﹩ʝ☹
& حسن 
