هنا

[ღ عِشق ღ]

روحي عقلت واختلف قانونها
العشرة التـعب بلاها ودونها
وياك كلش صار باهت لونها
ماتقدر ؟.. غيرك ايقدرونها
منك آنه شحصلت غير المرار؟
ودمعة عيوني وسواد اجفونها
وحرگ اعصاب وسهر شذكر
طلعتـها اوياي من ماعونها
هسه احس مرتاح ياحب ياغرام!
شوف وجهي وشوف صحتي شلونها
اصدقاء اويـاي شبان وبنات
العدها واحد ميت يسلونها
على طول الوكت يحچولي نكات
روحي صعبة وعجزوا يضحكونها
مدري بيه الخلل متعلم عليك
مدري هيه الناس مدري شلونها
انت بعيونك تلمحلي بكلام
شفافي ع الـماكو وتشر اسنونها
المهم انتهت
شلي بهالكلام
اشحصلت ليلى اشقبض مجنونها
ها شباب اليوم نطلع صايرين
توكلو بالله الطرق تندلونها
احلى شلة واحلى لمة واحلى مود
خايف احسد روحي ياخيـعونها
لحظة هذا الدرب بـي ذكريات
يعني من دون الطرق من دونها
كون ذيچ الشجرة تنگص وتموت
وكون هاي المسطبه يشيلونها
خايف يسـألوني عنه فلان وين
ماعـدا التسأل دفن بعيونها
شلون محد منتبه عرفوني زين
الفـرگة شم الناس يشتمونها
فدوة ذاك الجسر لا تعبر عليه
هنا حلفنه العشرة أبـد منخونها
وگلي هم ايمر وكت تنساني بي!
گتله من اجنازتي يشـيلونها
ومانسيتك لا وحق ذيچ السنين
الدنيا اذا انسـاك اغير كونها
لازم انبدل الأماكن بس محال
اشم عطرك وين ميـخلونها
ولازم أغتال الزمن والغي الفصول
آبها وتشرينها وكانونها
وامحي أثر خطواتنا بكل الدروب
والحچايه المن نمر يحـچونها
انه لو ناسيك ومغادر هواك
الرجفة هاي بجسمي شيسـمونها
وليش اغاني التطلع تذكرني بيك
ادموعي تنزل گبل مايبدونها
نعمة النسيان اكبر چذبة هاي
ماتصرف بعد لتعيدونها


الشاعر يحيى العلاق


Zhr

[مِـيهہرَمــآهہ ♬✿]

تسلمين عمري

[ღ عِشق ღ]

تسلمين عمري

هلا وغلا قلبي



.