السلام عليكم :
أكو مَثَل قديم عند أهلنا (لازم الشي من جَعبه) -الجيم تلفظ ch هذا توضيح لغير العراقيين- ، يطلقون هالمثل على الشخص اللي يفهم نصف الموضوع ويسوي نفسه عالم بيه .. أو اللي يفهم المسألة بصورة خاطئة ويسوي نفسه علّامة ويظل يفتي بيهة .
وطبعاً اليسوي هالشكل ما راح يشتغل عدل ، مثل اليلزم الخاشوكة -الملعقة- بالمكلوب ويريد ياكل بيهة أو اليمسك الكوب بالمقلوب ويريد يصب بيه ماء ويشرب.
بعد هالمقدمة الطويلة اللي دوختكم بيهة .. أحب أسلط الضوء على ظاهرة مزعجة منتشرة ، الناس ظلت تفتي بالدين بكيفها وهي أبسط أحكامه ما تعرفها لو ما تطبقها، مثلاً برؤية الهلال كلهم يصيرون علماء فلك وشيوخ ومراجع ويتناكرون بينهم .. والمضحك نصهم شهادة ابتدائية ما عدهم .. والمبكي والمضحك نصهم لا صلاة ولا صيام ليش يتعاركون عالهلال ما أدري ؟!
نموذج ثاني من الفايتين بالدين من العكس : بمقاطع الأغاني على يوتيوب تفوت تلكى كم واحد مسوي نفسه نبي وكاعد يتفلسف بالدين ، زين يا حبيبي اذا انت تكول الأغنية حرام شجابك هنا ؟ سامحوني على هالكلام الجاي .. ينقل لي أحدهم [ حتى ببعض المقاطع ال +18 موجودين هالنماذج اليسوون نفسهم أنبياء زمانهم] شجابهم هناك أسألوهم .
نموذج ثالث : بصفحة على فيسبوك ناشرين (يقولون الأخو الأكبر سند ، اكتب مين سندك) ، واضح صاحب المنشور يريدك تكتب بالتعليق اسم أخوك الكبير أو تسوي له tag ، بس تعالو شوفو العباقرة جايين وكاتبين (ماكو سند غير الله) و (الله سندي) و... نعم نعرف ونؤمن بالله سندنا ومدبر أمورنا ، بس هالغلو الزايد غلط .. جاوب عالمنشور بإسم اخوك لو اسكت لتتفلسف .
نموذج رابع : بمقاطع سياسية على يوتيوب مثلاً حروب او نزاعات تلكى نص التعليقات (صلي عالنبي) (سبحان الله وبحمده) (لا تترك صلاتك) ... عمي والقرآن الكريم والله العظيم ندريكم مؤمنين بس هذا مقطع سياسي أو وثائقي مو ديني شوية تعلمو .
أريد أعرف سبب هالتفلسف الزايد المغلوط بالدين وشلون نعالجه.
سامحوني دوختكم اللي يريد يحط رأيه حياه الله
رد مع اقتباس
المشاركة الأصلية كتبت بواسطة Suzana
