هنا

[نصرالدين البلداوي]

السلام عليكم
شلونكم
اني ما جاي علمود تقييم أو شيء بس حبيت اطرح تجاربي خلال سنة وشوية من الزواج
طبعا الحجي كله عامي ماكو فصحى يمكن

بداية زوجتي الله يحفظها ما مقصرة باي شيء والحمد لله

الزوجة هذا الجنس اللطيف والعنيف بنفس الوقت الحساس والحيوي وعدها مشاعر تفوق مشاعر الرجل ب١٠ اضعاف ههههع لذلك لازم تعرف شلون تتصرف

التصرف يتم كالتالي

ماكو يوم يمر اذا متسمعها كلام حلو مثل حبيبتي عمري حياتي أو تدلعها طبعا تقربك الها بشكل مو طبيعي وياها طبعا تستخدم كلام اذا متعبين عيني او اذا تكدرين عمري أو كلام حلو بكل طلب تطلبه مستحيل تردلك هذا الشيء لان الكلام الحلو ينسي التعب

تحاول دائما من تطلع تكلها عيني محتاجة شيء من اليوم اجيبلج شيء ويايه أو انت تفاجئها بشيء تحبه حتى لو متريد حتى لو بابسط شيء والزوجات الجديدات يكيفون على الحلويات

دير بالك تنسى ذكرى زواجكم أو عيد ميلادها أو اي عيد آخر هي متنسى لو بعد الف عام واي نسيان منك مينسي وميتعوض على غير يوم

حاول دائما تخلق جو مرح وياها تشاقة دائما سواء بكلام أو بوكسات هههع اتشاقة بس لتطوخها خليها تضحك ترى ضحكتها تسوى الدنيا كلها

احترمها من كل النواحي وخلي وقت مخصص الها خصوصا بالليل واحجيلها شصار مصار بيومك شاركها لحظاتك

من تكلك عمري أو كبدي بادرها بنفس اللفظ واهم شيء تستخدم كولي عيني تردين شيء

حاول تقلل الشغل عليها يعني مو روحي جيبيلي ماي أو جيبيلي فلان شيء هو على بعد متر عنك هي خطية هم تتعب مثل ما انت تتعب

اذا غلطت وياها صالحها لان خطية الحزن يبين عليها بسرعة واءا تعاركتوا انت ابدي بالصلح لان النسوان عنيدات بهاي السوالف

كل فترة شهر اخذها لمطعم أو لمكان حلو
وكل فترة ااسبوعين اخذها لسوبر ماركت أو مول حتى لو متشتري المهم طالعة وياك

بالبيت اطلب منها تسويلك اكلة وراها أكل وياها واشكرها واحجيلها حجي حلووو مثل طيبة مثل كلبج عاشت ايدج وياها طكلها صورة وستوري وسويلها منشن

دائما أخذوا صور سلفي وكل فترة اكعدوا شوفوها احاسيس رومانسية هههع ضروري هاي النقطة


كافي صار حجيت هواي طبعا بعد اكو بس تعبت

تحياتي لكم

[مِـيهہرَمــآهہ ♬✿]

عاشت ايدك نصائح حلوة وفعلآ اكثرها. انحبها احنا
وخاصة طلعونا وياكم حتى لو منشتري شي

تسلم دكتور الله يسعدكم دائمآ. ويحرسكم.

بالتوفيق يارب

[أبن ألأشتر]

حياك الله دكتور
كلامك هو الصحيح لايعلو عليه كلام اخر
كله شفافية وحب وما الاجمل من ذلك .
.............
بس اكو شيء يفوتك لربما تقيس على زوجتك الصالحة الطيبة
حفظها الله من كل مكروه .
يعني قسمتك حلوة والحمد لله والشكر على كل حال.
.............
خليني احجيلك الشكل الاخر من النساء المختلف من أمرأة الى اخرى كما
يختلف الرجال بالطبع والطبيعة .
فبعضهم تحتقرة يحترمك والاخر تحترمه يحتقرك حاشاك .
لابد ان ننتبه لهذة الحالة قد تكون بالتكوين ولو أخذ الكل كلامك الحلو والطبيعي
لربما تظلم احدهم أي (تكون قسمته سيئة وصعبه) يعني من النوع الثاني .
من تجربتي .
مطلق اثنين .
وحده اجنبية والاخرى عربية .
هذول . اذا موكل شهر ياكلن المقسوم ولم يراً زجر وزمخ مااشوف اهتمام ولاراحة بال .
الا بالاهانة حاشاك .
وطبعا من طلكَت الاجنبية .وبعد اكثر من سنتين .سافرت وبطريقة وبالصدفة شفتها .
يادكتور البنت تتحسر وتبكي بحضني
وتقول .اخذت واحد بارد في حين ذاك المقصود اكبر مني مستوى
واكثر مالاً .
يابه ليش بارد .تقول عمره ماعترض على شيء .
شوف التعبير .. اشلون تحلله .
وبعدين جاملتها بطريقة يعني مابين جد ومزح .
فقلت لها .
يعني كان للضرب طعم بالنسبة لك .(ملاحظة الضرب هناك بالغرب جريمة كبرى )
لكن انا تجاوزتها بنجاح ليش .
الظاهر هي تحب ذلك (والا انوخذنا يصابر)
ضحكت وقالت تريد الحق .نعم .
فقالت ياريت عليه .
والعربية اخبارها التي تصلني . سيئة اعوذ بالله
هاي قبل ... صار عشر سنين ماعندي خبر عنها .
المهم سمعت ان زوجها مدللها وهي ترمي سهام للغير .
فمداخلتي دكتورنا الطيب .
البشر مختلف . وعلينا الحيطة والحذر .
..........
النتيجة موضوعك قمة بالجمال وينثر خير
ومحبة شكرا لك
بالتوفيق دكتورنا

[رحيـــل]

فدوا ترا

[M̲u̲S̲h̲T̲a̲Q̲ツ]

أبلغ موضوع شفته للان بالخصوص
عاشت ايدك ورد

[نصرالدين البلداوي]

الله يحفظكم نورتوا

[نغم الجبوري]

كلام حلو وجميل وحته اسلوبك راقي
الله يحفظكم نشاءلله
عندي زوجي يا دكتور من نوع الي مخلصهه سكته ابد مو جريء وياي يعني عود كدامي ويكلي حبيبتي ابد ما سامعته منه بس بالتليفون
كدامي ويكلي مشتاقلج ابدا ماكو بس بالتليفون وها ب رساله ما اسمعه
بالبيت من يطلب شي سوي جاي سويلي غده وكالب وجهه واني يي من عيوني تدلل كم ابو ود عندي ومن هالكلام الحلو حبيبي رايد شي حياتي اريد هيج شغله ومن هالكلام هههه هواي شغلات اني الي ابادر بيهه وهو لا
شخص عن شخص يختلف.. اختلاف جذري
مشاركتك جميلة ومبرووك الك

[علي الواسطي]

بالبيت اطلب منها تسويلك اكلة وراها أكل وياها واشكرها واحجيلها حجي حلووو مثل طيبة مثل كلبج عاشت ايدج وياها طكلها صورة وستوري وسويلها منشن

تحياتي لكم

ذكرتني بالاكل هذا الماعنده حظ

[مِـيهہرَمــآهہ ♬✿]

الف مبروك نصوري
تم تثبيت الموضوع.لمدة ثلاثة ايام

[نصرالدين البلداوي]

كلام حلو وجميل وحته اسلوبك راقي
الله يحفظكم نشاءلله
عندي زوجي يا دكتور من نوع الي مخلصهه سكته ابد مو جريء وياي يعني عود كدامي ويكلي حبيبتي ابد ما سامعته منه بس بالتليفون
كدامي ويكلي مشتاقلج ابدا ماكو بس بالتليفون وها ب رساله ما اسمعه
بالبيت من يطلب شي سوي جاي سويلي غده وكالب وجهه واني يي من عيوني تدلل كم ابو ود عندي ومن هالكلام الحلو حبيبي رايد شي حياتي اريد هيج شغله ومن هالكلام هههه هواي شغلات اني الي ابادر بيهه وهو لا
شخص عن شخص يختلف.. اختلاف جذري
مشاركتك جميلة ومبرووك الك

الله يسلمج اختي ام ود
الله يحفظكم اولا
عادي كلش الفرق بين شخص وشخص
بس مرات الواحد لازم ينتبه انه دا يتعامل وي شخص عنده مشاعر وأحاسيس اكثر منه ب١٠٠ مرة ولازم يعرف شلون يداري خبزته

ذكرتني بالاكل هذا الماعنده حظ

ههههههه غير ما احجي شيء
كلش طيب عيني عاشوو

الف مبروك نصوري
تم تثبيت الموضوع.لمدة ثلاثة ايام

تسلمين عمتي مقصرتي