ياگُــمرهن لا يعطـشن من تروح
الرايده منك الماي انطيها روح
أُم الـوفه تـوصي المايتوصه
عباس اريد اعله الضعن يكسر افياي امتونك
واكبر اگبال العـايله خل كلهم اشـوفونك
اشرگ وخل عـين الشمس تعـطش وتـشرب لونك
عيـونك أمـان لكل صبح مصدر أمان اعيونك
اكبال زينب دنگ اونگط حنان
وعالهوادج طش ضوه اعـيونك أمان
ياعالي بس اگبال زينب تنصه
أُم الـوفه تـوصي المايتوصه
____________________________
من المدينه الكربله يُـمه المسافه اچبيره
گل الخواتك ياگمر ماتمر بيچن حيره
هالدرب مو شمرة عصه شمرة محنه وغيره
وخل وين ماچن الضعن يلگن سمارك ديره
الليل لو چل صـير للخدر مضيف
وگلها زينب خويه حمل الطف خفيف
ولا تنطي لـلخوف إعله زينب فرصه
أُم الـوفه تـوصي المايتوصه
____________________________
عباس يم مـرة الحـسن سولف ابعرس القاسم
طمنها خليها تـحس من يـهد يرجع سالم
گللها ابنچ بالحرب بي كل شجاعة هاشم
ضم عنها لچمة طعنته ولوعة اصواب الظالم
گلها بچفـوفي اجيب الحنته ماي
وانتي عجنها واحطها ابيدي هاي
وانطينها من هيبة أمانك حصه
أُم الـوفه تـوصي المايتوصه
____________________________
بالليل لو چل الضعن عالحرم شوفك وزعه
وحسـين كلما يلتفت يلگاك واگف شمعه
من الرباب اعله الطفل ماريد توگع دمعه
عبدالله اريد اتدلله ومن المناغه اتـشبعه
مو ابمهده يمه خل يغفى اعله اديك
وانته حط الله حنان الدنيا بيك
ونحر الطفل يترك ابگلبك غصه
أُم الـوفه تـوصي المايتوصه
____________________________
من توصلون الـكربله خلي السبط بس يامر
خل وين ماينطي الوجه يلگاك چلمة حاضر
ابنيلهم بيدك خيم وين التسر الخاطر
ومن جربك درب الخيم رايدته اخضر صاير
يمه من يوصل ضعنكم للطفوف
ابكل خيمة وتد حط الچفوف
ويا راس يوصل للخيام اتگصه
أُم الـوفه تـوصي المايتوصه
____________________________
ياموقف ابيض ياگمر ياسالفة كل خير
اكبر اريد ابوگفتك يطلع الطف ازغير
بالطف اريدن موقفك لأدهى العقول ايحير
عباس ليل الطف وحش كلساع لاختك سير
العينها اقرب صير حتى من الرموش
اوگلها ماخف زودي من كثر الجيوش
ماي البحر ياغرفه ايد اتخلصه
أُم الـوفه تـوصي المايتوصه
____________________________
كلمات الشـاعر : مـُصطفى حـرب
رد مع اقتباس
المشاركة الأصلية كتبت بواسطة هيڤين
